Wp/blc/Hawhaw

Hawhaw-tum tu lhkw' tu tsitstsipii txw, ninitsaw txw alh tu ayk' txw. tamlulustalh k'u c txw slhlmaw tu tl'msta txw alh ti suncwt, ti snaaxwmaw tu hawhaw txw.

Axtsikayc ts'ayc, ala asiknalusaw wa lhnus wa hawhaw

tu amataw txw

apsulhakw tu hawhaw txw ala smsmt ts. Alh tu patsalh txw kalaalhmtim txw alh tu snuhawhawtalhhtum tu smt tx . Sastaw txw ulh Stsalh, k'ctim alhtxw alh ti Smt, Nulhuulhk’uulh. K'ctimkwtuu alh Nutl'l - putl'akw ulh txw sinaycaktit tu patsalh tu tl'msta txw alhtxw, swinanaw ulh ti sk'amtsk tc, apsulhs alh Axtsikayc ala asuutss tu Nuk'lattum wa anuxum ts. Yanicit kw tu hawhaw txw ska alhitimutaw ala uts'iks wa ilhm wa amat.

alh7aynaw sninitsaw

Smsmayuutsinilh slhxanmlhaw tu hawhaw txw, snulhukw'aaxlhtit wa tl'msta ika axw alhkaltcwmitsutaw alh txw. Alats'iitutim ka lhxanm ska lhmtutk'u ka mila ala asiknalusalhaw ts stsitumanaw ala tl'uk'ankiixws wa smt. Alhnapilh matuu ti s7alh7ayutsaw - "hawhaw" - ti sipaaxtim ca sHawhaw alh ti suncwt.

Alh7aytutim txw smsmayakmtim

Smsmayamktim alh ti smsmanaw wa numus wa Q'umk'utsmc, skalhyakinaw ulaaxlh alh Nutcictskwani. Wnts'tim wa csuuts wa hawhaw ts c ti numaw ti lhxanm tc, t'ksnmtim txw alhtxw c tx.