Wp/blc/Clyde Tallio

Clyde Tallio

Wic Snxakila wa itnuxalkmciixw wa skwatstas Clyde Tallio. Muslancwam its'ik s7acwsalctum Snxakila ctu lhikw'lcaaxtalh txw. Acwsalctum ala smayustalh ts, ala stl'cwilh ts, ala kusyutiixw n wa sisawkiixw wa ts'ktalh ts. Acwsalctum tuu ska Itnuxalkmcs. Apcwim tc ctu Acwsalctnms txw alh ti lhlm. Asmayuustntum tc ca lhikw'lcaaxtalh ts. Axwmas tsayliwas Snxakila ska acwsalctimuts - tl'antl'apayc tc ula ka umatstum sqwlctum wa lulustalh ts, wa sq'lhkwaakilh ts, alh Washington D.C., alh Tsaamas, ays tuu alh Pankupa. Anustsayanms tuu ula alhqulhuutss Axtsikayc ula s7anutsnmis wa tsay wa alhi alhts.

Ala matl'ap s7ays Snxakila, acwsalctutis wa mnmnts' ts alh Acwsalcta. Ksnmaks tuu ala stataltmc ts si7acwsalctutis ala ts'ktanaw sstaltmctimutaw. Ksnmak tc alh Nunanta n Niki Kechele alh ti Nuxalk Ancestral Governance Project tc.