Topèng Betawi (hurup Arab Gundul: توفڠ بتاوى; basa Indonésia: tari topeng Betawi) aja entu orang Betawi punya atu bentuk lènong ngibing ama lakon. Ni lakon-ngibing nglingkup ibingan, gending, bebodoran, ama lakon. Topèng Betawi nampilin tèma-tèma orang Betawi punya keidupan nyang ditampilin dalem bentuk ibingan ama lakon. Digero' topèng lantaran èmang maké topèng atawa kedok pas lagi ngibing nyang dipercaya katanya ada kesaktiannya.
Sejarah èn asal-usul
Topèng Betawi awalnya dikeja ama Ma' Kinang èn Kong Ji'un di tahon 1930 nyang disawabin ama ibingan topèng Cerbon. Ni bentuk lènong lakon ngibing ngembangnya di pinggir-pinggiran Jakarta, nyang digeronya orang Betawi Pinggiran (atawa Betawi Ora).
Paèdah kemasarakatan
Ada berapa paèdah kemasarakatan deri topèng Betawi. Jaman bahola, orang Betawi pada percaya kalo itu kedok bisa ngindarin bahla, penyakit, ama musibah. Walakin, wayah gini, topèng Betawi cuman bakal jadi hiburan di keriaan-keriaan Betawi doang, kaya' di kawinan Betawi, sunatan, ama lebaran.
Alat gending
Bakal ngiringin penampilan topèng Betawi, alat-alat gending nyang biasa dipaké antara laèn: rebab, gong, kendang, kempul, kulanter, ama kècrèk.