Surat lèstrik (hurup Arab Gundul: سورة لستريک, disingket: surlès) atawa mashur juga' sebutan Inggrisnya electronic mail (disingket: e-mail atawa email) entu atu ladènan internèt nyang ngeja orang nyang gableg aderès surat lèstrik (rèkening) bakal ngirim atawa nerima surat lèstrik. Ni kurang lebi kaya' surat pos, ila aja ni dikirimnya lebi lekas deripada surat pos nyang dikirim liwat apstan nyang jau, apanan biasanya ni perdèo.
Kaya' surat biasanya, pemaké bisa aja dapet surat lèstrik nyang kaga' dipèngènin. Kalo di surat lèstrik, ni namanya sampahan (spam). Ada program nyang dipaké bakal ngirim ama nerima surlès nyang bisa ngendus sampahan èn nyaring entu biar cedang pisan.
Bakal ngirim atawa nerima surlès dalem adat nyang umum, orang butuh alat (kumpiuter, pesawat, èns.) nyang kecangcang ke internèt èn program surlès (bisa digero' aplikasi penyurat). Ada berapa bentukan ada bakal aderès surlès. Pormat nyang paling galib, digero' RFC 2822, bentuknya pemake@domen.com. Pesen surlès paling umum dikirim dalem bentuk tulisan, èn kadang dalem setil HTML.
Ada berapa matskepé nyang ngeboléin orang ngirim ama nerima surlès kaga' bayar deri pelampang jarak jau. Gmail, Hotmail, èn Yahoo! entu tulad di antara nyang semacemnya nyang ngelakonin ni macem "surat jala". Surat jala kaga' percis ngikutin sorot di bawa bahna halaman jalanya entu aplikasi jala èn ngopènin banyak tètèk bengèk sendiri. Adat nyang paling umum entu maké aplikasi penyurat, biasanya lumbrah paké pesawat pinter.
Microsoft nemuin dia punya "protokol kuminikasi" (aturan-aturan) sendèwèk bakal ngirim ama nerima surlès, nama Exchange. Protokol Exchange gawé bener-bener béda deri cara terdisionil èn kaga' dijabarin di mari.
Ruju'an