Dr.(HC) Ir. Soekarno (ER, EYD: Sukarno, name lahir: Koesno Sosrodihardjo) entu Presiden Indonesia pertame nyang ngejabat pade periode 1945–1966. Die mainin peran penting dalem ngemerdekain bangse Indonesia dari penjajahan Belande. Die entu Proklamator Kemerdekaan Indonesia (bareng-bareng ame Mohammad Hatta) nyang terjadi pade tanggal 17 Agustus 1945. Soekarno entu nyang pertame kali nyetusin konsep Pancasila sebagai dasar negare Indonesia dan die sendiri nyang namainnye.
Soekarno nandatanganin Surat Perintah 11 Maret 1966 atawa Supersemar nyang kontroversial 'ntu, nyang isinye—berdasarkan versi nyang dikeluarin Markas Besar Angkatan Darat—nugasin Letnan Jenderal Suharto buat ngamanin ame ngejage keamanan negare ame institusi kepresidenan. Supersemar dijadiin dasar ame Letnan Jenderal Soeharto buat ngebubarin Partai Komunis Indonesia (PKI) dan ngeganti anggote-anggotenye nyang duduk di parlemen. Sehabis pertanggungjawabannye ditolak ame Majelis Permusyawaratan Rakyat Sementare (MPRS) pas sidang umum ke empat taun 1967, Soekarno diberhentiin dari jabatannye sebagai presiden pas Sidang Istimewa MPRS pade taun nyang sama dan Soeharto ngegantiinnye sebagai pejabat Presiden Republik Indonesia.