| Kiblik San Marino Repubblica di San Marino (Itali) Ripóbblica d' San Marein (Romanyol) | |||
| |||
| |||
| Ibu negeri | San Marino | ||
| Nama pengendek | San Marino San Marinès | ||
San Marino (hurup Arab Gundul: سن مارينو; basa Itali: San Marino; basa Romanyol: San Marein) atawa Sint Marinus (hurup Arab Gundul: سنت مارينوس) atawa resminya Kiblik[1] San Marino (hurup Arab Gundul: کبليک سن مارينو; basa Itali: Repubblica di San Marino; basa Romanyol: Ripóbblica d' San Marein) atawa juga' mashur digero' Kiblik Paling Anteng San Marino ((hurup Arab Gundul: کبليک فاليڠ انتڠ سن مارينو; basa Itali: Serenissima Repubblica di San Marino) entu atu deri negara-negara nyang paling kecit di dunia. Ni negara letaknya di Èropa Kidul èn bener-bener dikulilingin ama Itali (disebutnya cempètan, cuman Watikan, Lèsoto, ama San Marino doangan nyang kaya' gini). Ada kurang deri 30.000-an orang nyang tinggal di mari. Jumblah seruruh luas wilayahnya cuman 61 km2. Dia punya hopstad[2] juga' namanya San Marino.
San Marino entu kiblik paling kolot di antéro dunia nyang masing ada ampé wayah gini. Ni negara dimulain semprakan 3 Sèptèmber tahon 301 M ama atu tukang bangunan nyang gapa, Sint-Marinus. Ni – maktup di dalem dia punya wèt dasar[3] nyang dianut ari bulan 8 Oktober tahon 1600. Ni negara kecit diakuin ama Prasman Napoléoniah tahon 1797, èn ama laèn-laèn negara Èropa di tahon 1815 pas Konggrès Wènen.
Bagèn kata ni negara – negara merdèka, alakulihal, ni negara juga' begantung banget ama Itali. Sedari abad ke-19, pas Itali disatuin, San Marino bener-bener dikulilingin ama Itali.
Orang-orang di San Marino pada ngomongnya basa Itali. Sebagé lagi, orang-orang di San Marino pada nganut agama Serani Katolik Romèn[4]. Adapun orang-orang San Marino bisa digero' orang San Marino (hurup Arab Gundul: اورڠ سن مارينو), bisa juga' orang San Marinès (hurup Arab Gundul: اورڠ سن مارينيس).
Ruju'an
- ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Kiblik (hurup Arab Gundul: کبليک) – republik (Indo.); republic (Ing.).
- ↑ Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).
- ↑ Wèt dasar (hurup Arab Gundul: ويت داسر) – konstitusi (Indo.); constitution (Ing.); grondwet (Wld.).
- ↑ Hoetink, B. (2007). Ni Hoe Kong: Kapitein TIONG HOA di Betawie dalem tahon 1740. Penerbit Masup Jakarta. Romèn (hurup Arab Gundul: رومين) – Romawi (Indo.); Roman (Ing.); Romein (Wld.).