Papan lè lèstrik (hurup Arab Gundul: فافن لى لستريک; Inggris: tablet computer) atawa orang sering bilangnya paké istilah luar tablet ièlah atu kumpiuter tèngtèng tutug nyang kabèhannya entu layar tunyuk pèdèl. Ciri pembèda nyang paling kentaranya ièlah pemakéan layar bakal peranti masupan dengen maké gerip, pèn lèstrik, atawa ujung jeriji, gantinya paké papan tut atawa cecurut.[1] Mikrosop ngenalin pèrsi Windows XP bakal papan lè lèstrik nyang digeronya Tablet PC tahon 2000, sedeng Apple baru nongtotin dia punya pèrsi papan lè lèstriknya sendèwèk baru tahon 2010 nama iPad.[1] Tahon 2011, Samsung nongtotin dia punya pèrsi papan lè sendèwèk Samsung Galaxy Tab 7 (nyang entakonoh diterusin ama penongtotan Samsung Galaxy Tab 7.0 Plus) èn 10.1(P7100).
Istilah Betawi
Dalem basa Betawi, papan lè ada punya arti dalem basa Indonésia sebagé 'batu tulis' atawa 'sabak'.[2][3] Nah, itu tablet computer di basa Inggris kalu dalem basa Indonésia bisa ditarjim jadi komputer tablet atawa sabak komputer. Mangka, tarjim nyang pas bakal istilah Betawi ièlah papan lè lèstrik. Sebagé lagi, papan lè nyang beneran mah adanya jaman jebot. Jaman sekarang udah kaga' ada lagi. Selaèn bentukannya èmang medu, mangka, istilah papan lè bisa kita paké lagi—biar kaga' apkir ama biar kaga' ilang—bakal tablet nyang modèren, nya'entu papan lè lèstrik.
Ruju'an
- ↑ 1.0 1.1 Editors PC Magazine. "Definition of: tablet computer". PC Magazine. Diarsipin deri nyang asli 16 Juli 2010. Dibuka per 5 Sèptèmber 2023.
- ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta.
- ↑ Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung.