Lempung (hurup Arab Gundul: لمفوڠ) entu petilan lelumbèn nyang waton dasarnya entu silikat garis tenganya kurang deri 5 mikromèter. Lempung ada encagan silikanya èn/atawa alumunium nyang alus. Ni unsur pada, silikon, oksigèn, èn alumunium, entu unsur nyang paling banyak ngomplokin belongsong bumi. Lempung kebentuk deri prosès pengrusmusan batuan silika ama asem karbonat èn sebagèannya dihasilin deri juntrungan panas bumi.
Lempung ngeja bungkalan keras kalo kering èn jadi debèl kalo lèpèk kena aèr. Ni sipat disabitin ama jenis lelumbèn lempung nyang paling banyak di dalemnya. Lelumbèn lempung dirungkunin berales omplokan susunan okside silikon èn okside alumunium nyang ngeja dia punya bentuk belurannya. Rungkun 1:1 gableg sarang 1 penyerambahan antara okside silikon ama okside alumuniumnya, sementara kalo 2:1 ya duanya entu okside silikon nyang nyempèt atu lapis okside alumunium. Lelumbèn lempung rungkun 2:1 gableg sipat ngeluk nyang kuat, kena ngecil kalo kering èn nglèbar kalo lèpèk. Bahna ni abet, ni dia berapa jenis tana nyang kena ngeja kisut-kisutan atawa "peca-peca" kalo kering.
Ruju'an