Keraton Ngayogyakarta Hadiningrat (urup Arab Gundul: کراتون ڠايݢياکرتا هادينڠرة) atawa Keraton Yogyakarta (urup Arab Gundul: کراتون يݢياکرتا) atawa Keraton Jogja (urup Arab Gundul: کراتون جݢجا) entu keraton resmi Kesultanan Ngayogyakarta Hadiningrat nyang letaknya di kota Yogyakarta. Enni keraton dikeja ama Sri Sultan Amengkubuwana I di taon 1755 sebagé keraton nyang baru gara-gara pecahnya Mataram Islam gara-gara perjanjian Giyanti. Enni keraton entu pecahan deri Keraton Kasunanan Surakarta Hadiningrat deri Mataram Islam Surakarta (Kasunanan Surakarta). Jadinya, wangsa Mataram dilanjutin ama 2 keraton, ya'entu Kesultanan Yogyakarta èn Kasunanan Surakarta. Jumblah keraton Yogyakarta punya wilayah entu ngejenggar ampé 144 hèktar. Enni wilayah keitung bèntèng Baluwarti, alun-alun Lor, alun-alun Kidul, gapura Gladak, èn kumplèk Masjid Gedhé Yogyakarta. Selaèn entu, luas deri Kedaton (intinya) ampé 13 hèktar.
Walopun Kesultanan Yogyakarta resmi jadi bagéan deri Kiblik Indonésia di taon 1945, enni kumplèk gedong keraton masing jadi geriya sultan èn rumah tangganya masing ngejalanin terdisi kesultanan ampé enni wayah. Enni keraton uda jadi atu tempat lancongan di kota Yogyakarta. Sebagéan kumplèk keraton entu musium nyang nyimpen macem-macem kesultanan punya barang bolè simpen, keitung macem-macem barang nyang dikasiin ama raja-raja Éropa, tiruan pusaka keraton, èn gambang (gamelan). Deri gedongnya, enni keraton entu jadi atu tulad bakal gedong-gedong keraton Jawa nyang paling mantep, ada punya awla-awla nyang cakep èn lapangan, serènta pavilium nyang lega.
Ruju'an