Wp/bew/Institut Seni Indonésia Yogyakarta

< Wp‎ | bew
(Redirected from Wp/bew/Institut Seni Indonesia Yogyakarta)
Wp > bew > Institut Seni Indonésia Yogyakarta

Institut Seni Indonésia Yogyakarta (hurup Arab Gundul: انستيتوت سنى اندونيسي يوݢياكرتا; Indonésia: Institut Seni Indonesia Yogyakarta) atawa nyang disingkat ISI Yogyakarta entu atu perguruan tinggi seni negeri nyang ada di Kota Yogyakarta, Indonésia, Pasnya di Jl. Parangtritis Km. 6, Kelurahan Désa Panggungharjo, Kecamatan Sèwon, Kabupatèn Bantul, Daèrah Istimèwa Yogyakarta. Ni institut ngususin di pendidikan dalem bidang kesenian, nyang dikelompokin jadi tiga pakultèt, ya'entu: Pakultèt Seni Rupa, Pakultèt Seni Pegelaran, èn Pakultèt Seni Média Rekem. ISI Yogyakarta juga' udah punya Program Pascasarjana nyang programnya entu S2 ama S3 bakal Penyiptaan èn Pengkajian seni.

Sejarah edit

ISI Yogyakarta dikeja ari bulan 30 Méi tahon 1984 bedasarken Beslit[1] Persidèn (Keppres) RI No.39/1984 èn diresmiin ari bulan 23 Juli tahon 1984 ama Prof. Drs. But Muchtar nyang jadi rektor pertama. ISI dibentuk abisnya nggabungin bebrapa sekolah tinggi kesenian nya'itu: Akadémi Gending Indonésia (AMI), Akadémi Seni Rupa Indonésia (STSRI ASRI), èn Akadémi Seni Tari Indonésia (ASTI).

Sebelonnya, ni tiga sekolah tinggi seni bediri sendèwèk-sendèwèk. ASRI bediri tahon 1950 nyang awalny statusnya akadémi bekembang jadi sekolah tinggi di tahon 1968, namanya STSRI "ASRI". AMI lahir tahon 1963 nyang awalnya Sekolah Gending Indonésia (SMIND) tahon 1952. Sedeng ASTI, entuh kelanjutannya Konsèrwatori Tari Indonésia (KONRI) nyang muncul tahon 1961. Di taon 1973, tu tiga pimpinan sekolah tinggi pada mupakat dah tuh bakal ngeja atu lembaga pendidikan tinggi seni. Nah, jadi dah tuh ISI Yogyakarta di tahon 1984.

Awalnya, ISI Yogyakarta ada punya tiga pakultèt nyaitu:

  • Pakultèt Kesenian (FK) nyang mengrupa'in gabregan deri ASTI ama AMI,
  • Pakultèt Seni Rupa èn Rancangan[2] (FSRD) nyang mengrupa'in perwujudan deri STSRI "ASRI", èn
  • Pakultèt Bukangelar Kesenian (FNGK) bakal program pendidikan Strata 0, bakal pengasil tenaga/praktisi seni. Ni pakultèt, akirnya, ditutup bedasarin Beslit Rèktor ISI Yogyakarta tahon 1991.

Tahon 1993, Pakultèt Kesenian dirobah dah tuh dia punya nama Pakultèt Seni Pegelaran (PSP); Pakultèt Seni Rupa dan Rancangan – jadi Pakultèt Seni Rupa (FSR). Abis ntu, disusul lagi dah tuh atu pakultèt lagi, ya'entu Pakultèt Seni Média Rekam (PSMR) tahon 1994.

Program Pascasarjana S2 Penyiptaan èn Pengkajian Seni dibuka tahon 2004. Sementara Program Studi Penyiptaan èn Pengkajian Seni S3 dibuka sedari tahon 2006. Di tahon 2010, Program Pascasarjana mbuka' Program Magister Tata Kelola Seni.

Di jaman industri kréatip kaya' sekarang ni, ISI Yogyakarta bakal jadi nyang utama bakal nyitak orang-orang propèsionil di bidang seni èn industri kréatip. Seniman, tukang rancang[3], tukang poto, artis, aktor, pengelola galèri, pengusaha seni, èn pekerja-pekerja seni deri ISI Yogyakarta nempatin pos-pos strategis, baè' dalem kancah seni èn industri kréatip di trap[4] lokal, sional, régional, atawa antèrobangsa[5].

Pakultèt ama Program Studi edit

Pakultèt Seni Pegelaran edit

  • Program Studi D-4 Penyajian Gending
  • Program Studi S-1 Gending
  • Program Studi S-1 Pendidikan Gending
  • Program Studi S-1 Pengejaan Gending
  • Program Studi S-1 Èlmu Gending Kaum[6]
  • Program Studi S-1 Lènong[7]
  • Program Studi S-1 Ibingan
  • Program Studi S-1 Kerawitan
  • Program Studi S-1 Pedalangan
  • Program Studi S-1 Pendidikan Seni Pegelaran

Pakultèt Seni Rupa edit

  • Program Studi D-4 Rancangan Mode Kriya Batik
  • Program Studi S-1 Seni Murni
  • Program Studi S-1 Kriya
  • Program Studi S-1 Rancangan Jeroan[8]
  • Program Studi S-1 Rancangan Produk
  • Program Studi S-1 Rancangan Komunikasi Pisual
  • Program Studi S-1 Tata Kelola Seni
  • Program Studi S-1 Penglestarian Seni

Pakultèt Seni Média Rekem edit

  • Program Studi D-4 Animasi
  • Program Studi S-1 Gambar Poto
  • Program Studi S-1 Tipi èn Pèlem

Program Pascasarjana edit

  • Magister Seni (S-2)
  • Magister Tata Kelola Seni (S-2)
  • Doktor Seni (S-3)

Ruju'an edit

  1. Beslit (hurup Arab Gundul: بسليت) – keputusan (Indo.); decision (Ing.); besluit (Wld.).
  2. Rancangan (hurup Arab Gundul: رنچڠن) – desain (Indo.); design (Ing.).
  3. Tukang rancang (hurup Arab Gundul: توکڠ رنچڠ) – desainer (Indo.); designer (Ing.).
  4. Trap (hurup Arab Gundul: ترف) – tingkat (Indo.); level (Ing.).
  5. Antérobangsa (hurup Arab Gundul: انتروبڠس) – internasional (Indo.); international (Ing.).
  6. Èlmu musik kaum (hurup Arap gundul: علم موسيق قوم) – etnomusikologi (Indo.); ethnomusicology (Ing.)
  7. Lènong (hurup Arab Gundul: لينوڠ) – teater (Indo.); theatre (Ing.).
  8. Jeroan (hurup Arab Gundul: جروان) – interior (Indo., Ing.).