Hindu di Indonésia, sepegimana angkèt 2018 punya kata, cuman diplaktèkin ama sekitaran 1,74% deri kabèhan penduduk, èn ampir 87%-nya ada di Bali. Hindu dulunya pernah jadi igama nyang paling belatakan sebelonnya Selam neba' di mari. Hindu juga' jadi atu deri enem igama resmi guwernemèn punya akuin. Hindu masup ke Indonésia selamanya abad pertama masèhi liwat pedagang, merin, ulama, ama resi Hindi. Sebab lantaran adanya kacukan ajaran Hindu ama ajaran Jawa kolot setempat, serènta ajaran Buda, jadi dah tu Hindu macem Indonésia. Ni pikiran terus ngembang di jaman Sriwijaya ama Majapahit. Sekitaran tahon 1400-an M, ni kerajaan kepapagan ama Selam liwat pedagang Selam deri panté ke panté, mangkanya penganut Hindu mingkinan dikit èn kepingser deri mana-mana pulo Indonésia.
Indonésia entu negara dengen jumblah orang Hindu nomer 4 paling banyak di dunia, abisnya Hindi, Népal, ama Benggaladésa. Bagèn kata igama minoritèt, embanan budaya Hindu mah ngebadeg pisan di semua orang punya kebiasaan, ketumanan, èn juntrungan. Di luarnya Bali, pada ngejeprah dah tu penganut igama keruhun nyang ngaku Hindu biar dapet pengakuan resmi.