Gahwa[1] (hurup Arab Gundul: قهوة) atawa kopi[2] atawa kupi[3] (hurup Arab Gundul: كوفى) entu atu minuman nyang dibuat deri biji taneman jenis Coffea. Taneman kopi entu jogrogannya semak-semak atawa pu'unan nyang bisa tumbu ampé 10 mèteran (32 kakian), cuman biasanya dipongès dah tu biar rada pèndèkan. Aslinya, ni taneman tumbunya di daérah Habsi, mar sekarang mah udah ditanem di mana-mana negeri, kaya' di Amrik Kidul, Amrik Tenga, èn Asia Kidul-wètan. Arigini kopi malah jadi barang dagangan penting bakal banyak negara di dunia.
Adapun minuman gahwa dikeja deri tu taneman punya biji. Tu gahwa biasanya mah diminumnya panas-panas; – atawa dicampurin paké ès èn atu minuman nyang paling nyohor di banyak negara. Gahwa ada kimianya, nama kapéin, atu obat nyang bakal ngasi orang mendusin èn biar terus melèk matanya.
Bakal ngeja minuman deri biji kopi, tu biji kopi mulanya kudu dijembrèngin dulu kaga' lama abis dipetikin. Abisan ntu baru dah apan bijinya dah keringan, ngeja digongsèng atawa disangré. Ni ngeja tu biji biar pada awèt bakal simpenan. Sebelonnya tu biji dikeja jadi minuman, tu biji pada kudu digerus dulu. Tar, tu biji nyang udah pada digerus baru dah tu disedu paké aèr panas. Warnanya nyang coklat kereng ama rasanya nyang pait nongol dah tu pas udah disedu.
Gahwa ada ngandung macem-macem giji nyang ada paèdahnya, antara laèn: riboflavin, niacin, magnèsium, kalium, èn macem-macem senyawa pènol laènnya, atawa antioksidan.
Ruju'an