Dodol Betawi entu makanan khas anak Betawi, pastinye kudu ade di rumenye pas lagi Lebaran ato saat ade hajatan. Di beberape tempat dodol Betawi disebut juge sebagei kue raja.
Dodol Betawi dibuat dari bahan-bahan santen, tepung beras ketan, dan gula. Ade juga nyang dikasih panili biar tambah sedep dah rasenye. Cara pembuatannye, semue bahan tadi dicampur jadi atu dalem kuali gede dari tembaga (alias kenceng). Masaknye cukup dengan pemanasan api nyang kecil biar matengnye rata, pake tungku kayu bakar ato malah cuma pake blarak (daon kelapa kering). Adonan kudu diaduk-aduk terus, supaye matengnye rata.
Dalem pembuatan dodol Betawi dibutuhin tenage beberape orang, meski dari tetangge-tetangge aje. Ini karne pengadukannye nyang terus-terusan selame 7 jem. Kalo mao mateng dodol bakalan lengket, tapi tetep kudu diaduk terus sebab kalo kagak diaduk nanti rasenye kagak sedep. Ade juge sesame tetangge nyang bahan-bahan dasar pembuatannye pade patungan, ntar kalo dodolnye jadi bakalan dah dibagi rata.