Wp/bew/Condèt
Condet (hurup Arab Gundul: چونديت) entu atu daèrah nyang letaknya di bilangan Kecamatan Kramat Jati, Jakarta Wètan. Mulain beberapa taon belakangan, ni wilayah Condèt kebelèk jadi dua kerurahan, nya'entu Batuampar èn Balékambang.
Sejarah edit
Nama "Condèt" asalnya deri nama anak kali Ciliwung, yaitu Ci Ondèt. Ondèt, atawa Ondèh, atawa Ondèh–ondèh, ya'entu atu nama pu'un nyang name ilmiahnya Antidesma diandrum Sprg. Ni pu'un buahnya kena dimakan.
Data ketulis pertama nyang nyebut-nyebut nama "Condèt" entu catetan saparnya Abraham van Riebeeck, pas dia masing jadi Dirèktur Jèndral Kumpeni di Betawi (sebelon dia jadi Gubernur Jèndral). Di ntu catetan per tanggal 24 Sèptèmber tahon 1709, van Riebeck ama dia punya rombongan jalan ngelèwatin anak kali Ci Ondèt “Over mijin lant Paroeng Combale, Ratudjaja, Depok, Sringsing naar het hooft van de spruijt Tsji Ondet...,” (De Haan 1911: 320).
Keterangan kedua ada di dalem Pangèran Purbaya punya wasiat dari Banten nyang dibikin sebelom berangkat ke pembuangan di Nagapatman. Ntu wasiat disahin ama notaris Reguleth betanggal 25 April tahon 1716. Dalem entu surat wasiat, ketulis antara laèn kalo Pangèran Purbaya ngehibahin beberapa rumah ama kebo di Condèt ke anak-bininya nyang ditinggalin. (De Haan, 1920:250).
Keterangan ketiga ièlah Résolusi Pimpinan Kumpeni di Betawi betanggal 8 Juni tahon 1753, nya'entu beslit pasal penjualan tanah di Condèt seluas 816 morgen (52.530 ha) searga 800 ringgit ke Frederik Willem Freijer. Terus, kawasan Condèt juga' dijadiin bagèan deri tana partikelir Tandjoeng Oost atawa Groeneveld (De Haan 1910:51).
Jaman dulu mah, Condèt mashur ama kebon duku ama salaknya. Cuman seiring mangkin banyaknya warga, tu kebon-kebon pada ditebangin bakal jadi ruma-ruma penduduk.
Di jaman Gubernur Ali Sadikin, Condèt juga perna dijadiin kawasan cagar budaya masarakat Betawi. Cuman, ni kaga' dilanjutin lantaran mangkin banyaknya nyang dateng di mari. Selaèn entu, proporsi masarakat Betawi di ni kawasan juga' mangkin ngurang.