Ari sonder mobil (hurup Arab Gundul: هارى سوندر موبيل; singketan: ASM; basa Inggris: Car Free Day) entu dijadiin bakal suar ke orang-orang bakal nurunin ketagian masarakat bakal maké mobil atawa motor perorangan. Di Jakarta, ari sonder mobil digelar pertama kali tanggal 23 Mèi 2002. Enni kegiatan digelar ama Koalisi LSM Lingkungan bakal jadi tempat penampungan masarakat punya suara dalem pengejaan belèt pemerèntah.
Ari sonder mobil pada mulanya digelar di ari Ahad nyang paling akhir saban bulan di Jakarta. Enni kegiatan lamanya 8 jem deri jem 6 ampé jem 2 siang, cuman lantaran seambrek sesambat deri masarakat, akhirnya ari Ahad tanggal 26 April 2009 dipendèkin jadi 2 jem. Taon 2011, penggelaran ari sonder mobil mingkin nambah jadi sebulan dua kali. Terusannya, tanggal 13 Mèi 2012 ari sonder mobil digelar sebulan empat kali deri jem 6 ampé jem 11.
Enni di bawah daptar jalanan di Jakarta nyang ada punya ari sonder mobil (Saban ari Ahad deri jem 6 ampé jem 11):
- Semua kotip/trap propinsi: Jl. Jènderal Sudirman ampé Jl. M.H. Thamrin (deri perapatan Thamrin-Médan Merdèka Kulon ampé Bunderan Senayan).
- Jakarta Sintrem: Jl. Lètjèn Suprapto (deri perapatan Cempaka Mas ampé perapatan FO Galur).
- Jakarta Kidul: Jl. Sisingamangaraja (deri bunderan Senayan ampé perapatan CSW).
- Jakarta Kulon: Betawi Lama.
- Jakarta Wètan: Jl. Pemuda (deri perapatan Arion ampé perapatan Pemuda-Bekasi Raya).
- Jakarta Lor: Jl. Boulevard Kelapa Gading (deri bunderan La Plazza ampé tugu Summarècon)
Ruju'an