Wp/arq/موزمبيق

الموزمبيق

مابوتو لعاصمة تاع موزمبيق

الايدارة

البلاد : موزمبيق

نظام الحكم تاعها : جمهورية

رئيس الجمهورية تاعها : فيليب نيوبي

الوزير اللّول تاعها : كارلوس أڨوستينو دو روساريو

اللوغات الرسمية : برتغالية

لعاصمة تاعها : مابوتو

الديموغرافيا

ناسها : موزبقيين

سّكان : 25900000 ش (2003)

لكثافة تاعها : 28 ش/كم²

الجوغرافييا

مساحة تاعها : 801590 كم²

مساحة تاع الما : 2,2

لولاية لكبيرة فيها : مابوتو

لمنطقة زمنية تاعها :ت ع م+2

التاريخ

لإستقلال : برتغال

تّاريخ : 25/06/1975

الإقتصاد

لعملة تاعها : متكال موزمبيقي

م ت ب (2012) : 0.327 ∆

تنويعات

رمز لأنترنت تاعها : mz

رمز لهاتف تاعها : 258+

الموزمبيق

الموزمبيق ولا كما يقولولها فاللوغة الرسمية جمهورية الموزمبيق هي بلاد جاية فالجنوب شرقي تاع قارة أفريقيا، محاوطة بجانوب فريقيا، سويزيلاند، مدغشقر، مالاوي، زامبابوي، زامبيا و تنزانيا. هذي لبلاد مستعمرة برتغالية قديمة. الموزمبيق مكلاسية اللّولة فأفريقيا بسكانها و الزّاوجة بمساحتها. لبلاد هذي داخلة في بزاف منظّمات كما منظمة لبلدان تاع اللّوغة البرتغالية، المنظمة العالمية تاع فرانكوفونية و لكومنولث.

تّاريخ تاعها

لموزمبيق في 1930

فالعصور الوسطى كانو كاينين بزاف مبادلات تجارية مع التجار لعرب و مع غرب الأرخبيل الأندونيسي. لكاپيتان لإيراني إبن شهريار فالكتاب تاعو عجائب الهند، ذكر شهادة تاع تاجر عربي يسموه إبن لاكيس واش شاف عام 945. وصل للساحل تاع لموزمبيق ألف قارب صنعتهم واك-واك لي تجي مالجزر لمقابلة للصين تحوس على لعبيد و زنج (هذي كلمة عربية كانو يقولوها للّي يسكنو فساحل شرقي تاع أفريقيا، جماعة كبيرة من لي كانو يسكنو فشمال دخلو للإسلام.في 1498 وصل الملاّح الأسباني ڢاسكو دي ڨاما للموزمبيق. بعد مدة قصيرة استقرت البرتغال و بنات الحصون و ڨعدت خمس قرون فلموزمبيق. في 1964 اندلعت حرب لإستقلال فلموزمبيق و ڨعدت هذي لحرب عشر سنين. لموزمبيق ما ستناتش البرتغال تخرج من أنڨولا باش تنمي لإدارة تاعها لخاصة فلبلايص المحررّين. لعدد تاع ليزيكول و محو الأمية زاد، بناو مراكز تاع صّحة و طورو لمحاصيل زراعية. في 1973 دارو اللجنة الحزبية اللّولة و مدرسة الحزب لي تدرب لي كادغ تاوعها.مالڨغي توثيق تاع تنظيم سياسي كان قليل في هاذو لمناطق بصح فريليمو شجع لموزارعين باش يشاركو فاتخاذ لقرارات لمهمة. مورا لحرب تاع لموزمبيق لبلاد دات لإستقلال تاعها في جوان 1975 و ولات جمحهورية شعبية للموزمبيق و ولاّ نظام تاعها شيوعي، فريليمو ولات كتلة وحدة. انتخبو سامورا ماتشيل رئيسة للموزمبيق و دارت بزاف إصلاحات منها لإصلاحات زراعية، نظام تاع سامورا كان يحارب لقبلية و تأثير الأديان وهذا شي عجب بزاف سكان. لعام لّول تاع لاستقلال كان فيه بزاف إيسپواغ، و لبلاد لقات فيه بزاف دعم مالمعسكر الإشتراكي كما ( كوبا، يوغوسلاڢيا و الإتحاد السوفياتي) و حتى ماليسار لغربي. بصح جانوب تاع لبلاد كان لوضع تاعو معقد علاخاطر كان قريب من روديسيا و جانوب فريقيا و هذو كانو معاديين لحكومة جديدة. من عام 1967 بدات حرب أهلية دموية تسبّت ف الموت تاع مليون شخص في خمسطاعش عام، و هذا شي خلا لبلاد تدير فاييت و تولي من أفقر دّول تاع لعالم. في 1986 ماتت الرئيسة سامورا ماتشيل في حادثة تاع طيارة. ف التالي تاع الحرب لأهلية في عام 1992 دارو إتفاقية تسمح باش تولي الموزمبيق دولة ديموقراطية. في عام 1995 دخلت لموزمبيق للكومنولث، في لا فان تاع تسعينات " الشركات الصغرى لكندية" دارت استثمار في كثى من 8000 عفار معدني في كثر منهن 100 دولة منهم لموزمبيق و لأكثرية مازالهم في مرحلة لمشروع ولّي هي زيادة لعقود مع لبلدان لأفريقية .

سياسة تاعها

لموزمبيق هي جمهورية عاصمتها مابوتو، في هذي لبلاد لپريزيدون يدي يحكم موندا تاع 5 سنين، من وقت الإستقلال حتى لليوم كاين حزب واحد طاغي فالحكومة و لي هو FRIMELO. على حساب لمراقبين و لمعارضة الإنتخابات تاع 2004 كانت معمرة بالطرافيك، في جوان 2015 دارو قانون جديد ما يحاسبش على المثلية الجنسية و الاغتصاب.

تقسيمات تاوعها

لموزمبيق مقسمة ل 11 مقاطعة لي هوما :

1. مابوتو لا كاپيتال
2. كابوديلڨادو
3. نامبولا
4. تيتي
5. نياسا
6. زامبيزي
7. سوفالا
8. ڨازا
9. إنهامبان
10. مانيكا
11. مابوتو لاسيتي

لإقتصاد

Sحصد لجلجلان فلموزمبيق

لموزمبيق وحدة من أفقر لبلدان فلعالم، نص سكان تاعها عايشين فلفقر.

في 2012 تصنفت لموزمبيق على أنّها ثالث أقل لبلدان نموا فلعالم و هذا عطاها مؤشر تاع تنمية بشرية ضعيف بزاف 0،327.لإقتصاد تاع لموزمبيق يعتمد على زراعة، بصح لبلاد مازالها تقدر لقطن، سكر. و تنتج لكاچو و لكروڢات، لموزمبيق وحدة من بين أكبر ثمانيتة دول لي ينتجو لقطن في شرق و جانوب و شمال أفريقيا.

صيد تقليدي فلموزمبيق

لأصول رئيسية لتّنمية فلبلاد هي سياحة و تعدين. في 2007 دارو مشاريع تحت لرض باش ينحو لألغام لمعدنية و لفحم و ذّهب و لبوكسيت و تنتالوم. لمساعدات و لاستثمارات دولية خلات لبلاد تتقدم شوية و ولا لموزمبيق وحدة ملبلدان لي ما عندهمش بزاف ديون.

جوغرافيا

جبل موريس

لموزمبيق بلاد محدودة بتنزانيا و مالاوي و زامبيا و زامبابوي و جانوب فريقيا و سوازيلاند. عندها خط ساحلي طّول تاعو كثر من 2000 كم.لازون سافانا تاعها مڨطوعة بلأنهار لي جاية مل هضاب تاع أفريقيا لامونت بينڨا هي أعلى قمة جبلية فلبلاد و لإرتفاع تاعها يوصل حتى 2436 متر.لكليما تاع موزمبيق جاية ما بين إستوائية و شبه إستوائية.

ديموغرافيا

لبلاد هذي خسرت بزاف ناس فالحرب الأهلية، و شباب(نص تاع سكان عندهم قل من 20 عام). لوكان لموزابقيين يكون عندهم بزاف ولاد (خمس ولاد لكل مرا) نّمو طبيعي رايح ينقص بنسبة 12% بسبب مرض سيدا. فلموزمبيق ناس قلال لي يمدّولهم وسائل منع الحمل و في هذا لبلاد مكاش علاج طبيعي.

الدّين

فلموزمبيق كاين بزاف طوائف و بزاف ديانات بصح الطوائف الرئيسية هي المسيحية بنسبة 56،1% نص تاعهم كاثوليك و كاين الإسلام بنسبة 17،9% و كاين سوكان عندهم دين واحدوخر كما كاين ناس واحدوخرين حياديين ما عندهم حتى دين. على حساب موديرية شّؤون دينية المسيحيين تاع الأنجيل هوما لي يتزايدو بسرعة كبيرة فلبلاد. جينيغالمون لموجتمعات دينية تقسم لي مومبغ تاوعها على حساب العرق، سّياسةو ليكونومي.

صَّحة

فارماسي فلموزمبيق

فالموزمبيق عشرات الآلاف تاع نّاس يموتو ولا يمرضو علاخاطر ما يوصلهمش الما النقي تاع الشراب. لكوليرا و مراض واحدوخرين لي يتنقلو بالما هوما سبة اللّولة تاع الموتى مع لملاريا والسيدا. على حساب الامم لمتّحدة كل عام يموت كثر من 20000 طفل بسبّة لمراض لمنقولة بالما، وهاذ شي خلاها تتّلقى لعلاج ل 25000 طفل مع لمضادات تاع لڢيروسات لقهقرية.

تّعليم

مستوى تعليم فلموزمبيق يوصل حتى لتسع سنين عند لولاد و سبع سنين عند لبنات، وهاذ شي يعطينا متوسط تاع ثمن سنين تعليم.

اللّوغة

لموزمبيق بلاد فيها بزاف لوغات. و لّوغة رسمية تاعها هي برتغالية ورثتها من وقت لإستعمار. لموزمبيق داخلة فكامل تنظيمات تاع دول لي يحكو لبرتغالية.

فلموزمبيق كاين 43 لّوغة منها لبرتغالية لي يحكو بيها تقريبا كامل سكان تاع موزمبيق و سوختو لي يسكنو ف لي ڨغوند ڢيل، و كاين واحدوخرين يحكو سواحلية، ماكوا، تسينا، نادو وتسونڨا.

كاين لوغات واحدوخرين لوكال تاع موزمبيق كما لوموي و ماكوندو و تشوبي و تشوابو و رونڨاو و كيماواني و زولو و تسوا. لعرب و صينيين و لهنودا يهدرو لوغة تاعهم و دايرين برتغالية دوزيام، و كاين شوية عيباد يحكو لونڨلي.

الثقافة

في عام 1944 تبنات الكنيسة روحية غوثية في ماپوتو على شكل تاع كروا.

ليام و لعياد تاع موزمبيق

تاريخ	لإسم بجازايرية	لإسم لوكال
1 جانفي	لعيد تاع لأخوة	ديا دا فراترنيداد اونيڢاغسال
3 فيفري	ليوم تاع لابطال موزامبقيين	ديا دوس هيرويس موزمبيكانون
7 أفريل	ليوم تاع مرا موزامبيقية	ديا دا مولهر موزامبيكانا
25 جوان	عيد لإستقلال	ديا دا لانديپوندوس
25 سبتمبر	ليوم تاع قوات جيش تحرير لوطني	ديا دا FPLM
4 أكتوبر	ليوم تاع السِّلم	ديا دا پاز
25 ديسمبر	ليوم تاع لعايلة	ديا دا فاميليا