لخضر بلومي , زايد ف 29 مل ديسمبر 1958 فالولاية تاع معسكر , واحد من اللعابين العالميين الجزايرين , لاعب في خط الوسط , لعب 100 مباراة ما بين 1978 و 1989 ربح البالون دور فالواحد و ثمانين ,مل يعتبروه واحد من اللاعبين المخيرين تاع الدزاير و لافريك و حتى فالعالم ,هو اللي خترع العفسة تاع التمريرة العميا , لعب مع صالح عصاد و رابح ماجر , هاذو اللاعبين الثلاثة لي كانو في ليكيب ناسيونال تاع دزاير ف الثمانينات . تكلاسا الرابع ما بين اللاعبين الافريقيين تاع القرن من بعد جورج وياه , روجيه ميلا و عبيدي بيلي الشباب تاعو و بداية تاع الكاريار بلومي زاد في عايلة متواضعة فالولاية تع معسكر , هو الكبير بين خاوتو , باباه الي وسمو بشير بلومي كان يخدم فالفلاحة , وقع الكونطرا علا رباطاعش سنة مع ليكيب تاع الصغار في نادي اولمبي سامباك فالولاية تع معسكر , موراها بعام دخل مع ليكيب تاع لي كادي , كي ولا عندو سطاعش 16 سنة تسمى في ليكيب تاع الاكابر , لعب الماتش لولاني تاعو كونطر العمرية تاع وهرن الي ربحو فيه 0-3 كي ولا عندو سباطاش 17 سنة بعّد ب 150 كيلو على دارهم باش يروح لخميس مليانة و يسنيي مع صفاء الخميس في الدرجة الزاوجة موراها بعام عاود رجع للمدينة لي كان ساكن فيها باش يلعب مع نادي الغالي تاع معسكر