محمد بن تومي بن براهيم، المدعو الشريف بوشوشة، كان مقاوم ضد الاستعمار الفرنسي في منطقة الصحراء في مقاومة 1871.
بيوغرافية edit
محمد بن تومي بن براهيم، نزاد في الغيشى (جبل عمور، ولاية لغواط)و كان راعي. جوز عام في حبس معسكر (بوخنفيس)، بتهمة سرقة، من 1862 إلى 1863. منبعد، ولى يخدم كراقي لي إداوي، ما بين فڨيڨ (مروك)، و التوات و اين صالح. و ولى عندو مرتبة تع شريف. في 1869, بدا إلم في الرجال من الشعانبة و الطوارق و ولاد سيدي شيخ ,و في أفريل 1870 حكم المنيعة من أيادي القايد جعفر لي كان مع فرنسا, و يوم 5 ماي، حكم متليلي (غرداية). بعد معركة في واد سبسب مع قايد قبيلة لاربعة تع لغواط (بين أيادي الإستعمار الفرنسي)، جبد بوشوشة للأولف (اين صالح). في فيفري 1871, بوشوشة دخل على ورقلة (لي كانت في أيادي الإستعمار الفرنسي) و داهالهم. لحقوا بن ناصر بن شهرة (لي كان في جنوب تونس)، و دخلوا مع بعض على توڨرت.
الإستعمار الفرنسي بعت جيش في 1872, و عاودوا داو توڨرت و ورقلة للبوشوشة لي جبد في تيميمون.
في 31 مارس 1874, الجيش الفرنسي حكم بوشوشة و غنيمة تع 400 جمل، بمساعدة اغا ورقلة (سعيد بن دريس)، بعد 27 يوم من المعركة, في حاسي ميلوك (N 27°11′32″ E 2°08′12″) (بين اين صالح و اين غر). يوم 4 ماي 1873, طلعوا بوشوشة لللغواط، و يوم 6 ماي داوه لعاصمة ألجي. يوم 20 مارس 1875 جاز في المحكمة العسكرية الفرنسية تع قسنطينة. في المحاكمة بوشوشة قاللهم: " أنا ما نخافش مل موت، علابالي بلي درك تحكموا عليا،و عندكم الحق. سرقوني، خانوني، قتلوني، و نكروني لي كنت ندافع عنهم. مابقالي غير الموت، راني واجد. و بجاه ربي يزيونا من أسئلتكم، ما عندي ما نقوللكم. يزيوني من البطء ديالكم لي ما فيه حتى فايدة. و خلولي نعمة أن نتقتل بلخف". حكموا عليه بالإعدام. جوز 3 شهور في الحبس. و قتلوه ب 9 رصاصات يوم 29 جوان 1875 على الخمسة تع الصبح. كان لابس برنوس كحل و شاش حمر في راسو، ما قبلش إعصبولوا عينيه و قال قبل ما إموت :"نموت كي السبع. و قولوا لناس يدعيو لبوشوشة".
مراجع edit
Histoire de l'insurrection de 1871 en Algérie - Louis Rinn - 1891 - Éditeur A. Jourdan
Mangin E. - Notes sur l'histoire de Laghouat - Revue Africaine : journal des travaux de la Société historique algérienne - 1895
Voyage au Sahara - Norbert Dournaux Dupéré réd. d'après son journal et ses lettres par Henri Duveyrier - 1874 - Paris
12/07/1875 (Journal La Charente (Angoulême
Le journal du dimanche - 22/01/1905 - L. Forcade
Étapes sahariennes - Fernand Philippe - A. Jourdan, 1880