آسيا :(سمها جاي من اصل محترم ولي معناتو البلاصة لي طل منها السمش ) هي وحدة ملقارات السبعة ولا جزء ملقارة الكبيرة اوراسيا ولا افرو اوراسيا ، فيها 43810582 كلم مربع تاع مساحة و 4.3 مليار بنادم .آسيا هي الكبيرة قاع فلقارات (8.6% مالمساحة كاملة تاع لرض ولا 29.4 % مالرض الباينة) وهي المعمرة قاع بالناس ،فيها كثر من 60% من ناس لي كاينين فلعالم ، فيها فاني تنوع ثقافي وتنوع عرقي منساجم . وفهاذي القارة كاين الجبل العالي كامل فلعالم يسموه "ايفرست " يلحق لعلا تاعو 8848 ميترا ، فيها فاني البرج العالي كامل فلعالم جاي في دبي يسموه برج الخليفة يوصل طولو كثر من 828 ميترا ،تقدر تشوف منو بلايص بعااد بزاف فلمحيط حتى 2648 كلم في جيهة الخليج تاع الشمال الغربي تاع الصين . 1-المناخ تاعها :
كي نجو للمناخ تاعها نقدرو نقسموها على ربع جوايه:
*الجهة الشرقية والجنوبية: دايمن سخونة فصيف والريح وريح لي جي ملبحر الهندي جيب معاها النو ولي قادرة تسبب فيضانات وهذاك الجو ولرض المصطحة لي كاينة فما تميز هذيك البلاصة وضرورية لثقافتهم الزراعية على خاطر فما يزرعو الروز بزااف والروز لازملو السخانة والما قاوي .
*وكاين فاني جيهت لجبال في وسط اسيا وين كاين جبال الهمالايا ،الجو فيها بارد بزاف على خاطر عالية بزااف وزيد مقابلة الريح لي جي ملبحر والترسبات فيها قليلة حتى فصيف تصبب لرض خضرة يغطيها وحد الحشيش رقيق.
*وكاين فاني الشمال تاع آسيا :جيهة باردة بزااف والمناخ فيها قاري والشتا قاسي بزااف ،نقدرو نقولو مناخ قطبي على خاطر قريب للقطب شمالي وفي وسط هذي المنطقة كاين غابة كبيييرة بزااف يسموها "الطايقة" يعني الغابة تاع الصنوبر الكبير جاية قريبة للمحيط الشمالي فيها وحد نوع مميز تاع وحد الحشاوش والشجيرات ولي يسموها "التوندرا"
*وجيهة وخدوخرا يسموها آسيا الجافة ولي هي غرب آسيا :وهذي الجيهة معروفة بجفافها لاخاطر جاية كي شغول صحراء واسعة فيها الرملة والحجرة ،والجو تاعها يتميز بمناخ تاع لبحر لبيض لمتوسط من غرب القارة الضيق.
2-وضرك نروحو للحدود تاع آسيا :
كاين بزااف جغرافيين يعني الناس لي يرسمو الحدود تاع الدول يقولو بلي القارة تاع آسيا ماهيش منفاصلة على اوربا واسيا تشكل الشرق والشمال تاع "الافرو اورازي " يحدها مشمال المحيط القطبي الشمالي ومشرق المحيط الهادي وملجنوب المحيط الهندي وملجنوب الشربي البحر لحمر وملغرب المحيط الاطلسي (البحر لبيض لمتوسط ولبحر لكحل ) وبحر القوقاز وبحر قزوين ونهر الاورال وجبال الاورال وآسيا يفصلها على قارة الماريكان مضيق بيرنيف وبزااف بحور ومضيقات على عكس اوربا ولي هي تقريبا قطعة وحدة تاع لرض مترابطة مع بعضاها .
ويفصلها على افريقيا عامة قناة السويس لي جاية من جيهة صحراء سيناء في مصر ومصر جاية في وسط زوج قارات .
وضرك نهدرو شوية على التاريخ تاع القارة تاع آسيا : في مدة 6 قرون لي فاتت التطور تاع القارة تبنى على جيهتها المقابلة للبحر وجيهة الاتحاد السوفياتي والصين ومام الهند والانطلاقة تاع القارة عتامدت على بيبانها ومضايقها نحو الخارج .كوريا الجنوبية ،الطايوان ،هونق كونق ،سنغافورة ....
القوة السياسية والاقتصادية تاع اسيا فلقرن لي فات اعتامدت على القوة العسكرية باه تراقب المحيط الهندي وفان بانت داخل فالقارة فالانجازات كيما فصنعة تاع الطرقان والرايات تاع التران والفيلاجات والمدن وحتى التياوات تاع البترول والغاز صرات فيها ثورة فلبنية التحتية ولي ساهم فيها المهندسين المشهورين "انطوني بيبالو و ومالكوم كولك " بشكل كبير ولي ساهمو في ولادة اسيا جديدة كيما سماوها .
اسيا هي وحدة مسبع قارات ولا جزء ملقارة العملاقة اوراسيا ولا افرواسيا هاذي لقارة هي لموطن تاع اعلا قمة فلموند قمة ايفرست الي يوصل ارتفاعها ل 8848م و اعلا برج فلموند تاني برج خليفة في دبي