Wp/apc/تقويم ميلادي

التقويم الميلادي، اللي كمان معروف باسم التقويم الغريغوري أو الغربي أو المسيحي أو النصراني، هو التقويم اللي بيتّبعوه أغلب دول العالم بشكل رسمي. معظم الدول العربية بتسميه التقويم الميلادي لأنو العد فيه بيبدأ من سنة ميلاد المسيح، بحسب اعتقاد واضع العد، الراهب الأرمني دنيسيوس الصغير.

كمان اسمو التقويم الغريغوري نسبةً للبابا غريغوريوس الثالث عشر، بابا روما بالقرن السادس عشر، اللي عدّل نظام الكبس في التقويم اليولياني ليصير متل النظام المتعارف عليه هلق. السنة الميلادية هي سنة شمسية، يعني بتمثّل دورة كاملة للشمس بمنازلها، و مدتها 365.2425 يوم، لهيك السنة الميلادية فيها 365 يوم بالسنة البسيطة و 366 بالسنة الكبيسة، و بتتألف من 12 شهر.

التقويم اليولياني كان أقل دقة لأنه كان بيعتبر السنة الشمسية 365.25 يوم. الإصلاح الغريغوري أول شي تم اعتماده بالدول الكاثوليكية بأوروبا والدول اللي تابعة إلها. على مدى 300 سنة، الدول البروتستانتية و الأرثوذكسية الشرقية كمان انتقلت للتقويم المحسن، و آخر بلد أوروبي اعتمد التقويم الغريغوري كانت اليونان سنة 1923. و بسبب العولمة بالقرن العشرين، أغلب الدول غير الغربية اعتمدته للأغراض المدنية، و بيحمل اسم العلماني البديل "الحقبة العامة".

تاريخ تطوير التقويم الميلادي

التقويم الروماني القديم

كان بالبداية بيتألف من 10 أشهر، و من هون إجت أسماء كتير من الأشهر. بعدين استخدمو تقويم شمسي-قمري، و طول السنة فيه كان 354 يوم، وفيه 12 شهر، و عدد الأيام بكل شهر كان يا 29 يا 30 يوم، و هيك كان بيتوافق مع السنة القمرية. بالسنة اللي بعدها، كانو يضيفو شهر طوله 22 أو 23 يوم بالتعاقب، ليصير طول السنة الكبيسة 376 أو 377 يوم! و بهالشكل، كان متوسط دورة أربع سنين (354+376+354+377) بيساوي 365.25 يوم، اللي هو تقريبا طول السنة الشمسية.

هاد التقويم بينسب للإمبراطور نوما الروماني، بس الكهنة و القياصرة اتلاعبو فيه بعدين، فصارت بعض الأشهر، اللي اتسمت على أسامي قياصرتهم، 31 يوم على حساب الأشهر التانية. و عد السنين كان يبلش من سنة تأسيس مدينة روما، اللي هي 753 قبل الميلاد.

التقويم اليولياني

لما الإمبراطورية الرومانية احتلت مصر، استفاد الرومان من علوم الفراعنة الفلكية، و يوليوس قيصر عدل التقويم الروماني القديم بمساعدة فلكي إسكندراني اسمه سوسيجنيو. التعديل كان إنو السنة العادية تصير 365 يوم، و الكبيسة 366 يوم، و بتصير كل أربع سنين سنة كبيسة. و عدد أيام الأشهر الفردية صار 31 يوم، و الأشهر الزوجية 30 يوم، ما عدا شهر شباط اللي بيكون بالسنة العادية 28 يوم و بالسنة الكبيسة 29 يوم. هاد التقويم دخل التنفيذ بسنة 45 قبل الميلاد، اللي هي سنة 709 من تأسيس روما.

التقويم صار فيه تغييرات. الشهر السابع اتسمى باسم يوليوس قيصر و صار اسمه "يوليو"، وبسنة 33 قبل الميلاد تسمى الشهر الثامن باسم القيصر أغسطس (أكتافيوس). و لحتى ما يكون شهر يوليو أكبر من شهر أغسطس، زادو يوم بالشهر التامن على حساب شباط. بعدين عدلو عدد أيام الأشهر بعد أغسطس لحتى ما يكون في تلاتة أشهر ورا بعض بنفس الطول (يوليو-أغسطس-سبتمبر)، فغيرو القاعدة، و صار سبتمبر 30 يوم، أكتوبر 31 يوم، نوفمبر 30 يوم، و ديسمبر 31 يوم.

التقويم الميلادي

كان عدّ السنين في التقويم اليولياني مبني على التقويم الروماني القديم، اللي بيعتبر سنة تأسيس مدينة روما، اللي هي عاصمة الإمبراطورية الرومانية، بداية التاريخ، وهي سنة 753 قبل الميلاد. بس بنص القرن السادس، الراهب الأرمني ديونيسيوس اكسيجونوس دعا إنه يكون ميلاد السيد المسيح هو بداية التقويم. و فعلاً، نجح ديونيسيوس بهالدعوة، و صار عد السنين من سنة 532 ميلادية معتمد على سنة ميلاد المسيح، اللي كانت محسوبة كسنة 753 من تأسيس روما حسب حسابات ديونيسيوس.

التعديل الغريغوري

التقويم اليولياني كان معتمد على أساس إن السنة فيها 365.25 يوم، لهيك كانو بيضيفو يوم كل أربع سنين، فبتصير عندهم تلات سنين بسيطة فيها 365 يوم (وشهر شباط بيكون 28 يوم)، و سنة رابعة كبيسة فيها 366 يوم (وشهر شباط بيكون 29 يوم).

لكن الحقيقة إن السنة هي 365 يوم، و5 ساعات، و49 دقيقة، يعني هي أقصر بحوالي 11 دقيقة من السنة في التقويم اليولياني. هالفرق كان يتسبب بتقدم التقويم اليولياني عن الواقع بمعدل يوم كل 131 سنة تقريبًا، و3 أيام كل 393 سنة (أو تقريبًا 400 سنة). لهيك، قرر بابا الفاتيكان غريغوريوس الثالث عشر اعتماد نصيحة الفلكي أليسيوس ليليوس، و بعد وفاته كمل الفلكي كريستوفر كلافيوس على نفس النهج، خصوصًا إنه كان قلقان من تغيّر توقيت عيد الفصح اللي لازم يكون بالربيع. فأصدر البابا مرسومه بإصلاح التقويم اليولياني بالشكل التالي:

شطبو 10 أيام من التقويم، و قفزو من يوم 4 أكتوبر 1582 مباشرة ليوم 15 أكتوبر 1582.
بيضيفو يوم كل 4 سنين لأي سنة رقم آحادها وعشرات أرقامها قابلة للقسمة على 4، تمامًا مثل التقويم اليولياني.
بيستثنى من هالقاعدة السنوات المئوية اللي ما بتقبل القسمة على 400، متل 1700، 1800، 1900، 2100.. و هدول بيعتبروها سنين بسيطة، بينما السنوات المئوية اللي بتقبل القسمة على 400، زي 1600، 2000، 2400.. هدول بيعتبروها سنين كبيسة.

و لولا مكانة البابا الدينية، كان صعب يتقبل الناس هالتعديل، لهيك الدول اللي ما كانت كاثوليكية قاومت التقويم لفترة طويلة، لكن بالأخير، و مع القرن العشرين، تبنّته معظم الدول لأغراض مدنية. مع هيك، الكنائس الأرثوذكسية الشرقية والكنائس الأرثوذكسية الرومية لسه مستمرة على التقويم اليولياني، و الفرق بينه و بين الغريغوري صار 13 يوم. لهالسبب، الشرقيين المسيحيين بيعيدو عيد الميلاد يوم 7 يناير حسب تقويمهم، بينما الغربيين بيعيدو يوم 25 ديسمبر حسب تقويمهم.

أسماء الشهور بالعربية

في وادي النيل و معظم أقطار الجزيرة العربية

جدول شهور السنة الشمسية

رقم الشهر	شهور سريانية	شهور مصرية	الشهور المعربة المشرقية	الشهور المعربة من الفرنسية
01	كانون التاني	طوبة	يناير	جانفي
02	شباط	أمشير	فبراير	فيفري
03	آذار	برمهات	مارس	مارس
04	نيسان	برمودة	أبريل	أفريل
05	أيار	بشنس	مايو	ماي
06	حزيران	بؤونة	يونيو	جوان
07	تموز	أبيب	يوليو	جويلية
08	آب	مسرى	أغسطس	أوت
09	أيلول	نسيئ وتوت	سبتمبر	سبتمبر
10	تشرين الأول	بابة	أكتوبر	أكتوبر
11	تشرين التاني	هاتور	نوفمبر	نوفمبر
12	كانون الأول	كيهك	ديسمبر	ديسمبر

في المشرق العربي أو الهلال الخصيب

معروفة في العراق و سوريا ولبنان و الأردن و فلسطين بالأسماء المعربة من الأسماء (السريانية) الآرامية:

و الآراميين أخدو هي الأسماء من البابليين.

في مصر و السودان و اليمن و ليبيا و دول الخليج العربي، باستثناء السعودية التي بتستخدم التقويم الهجري رسميا، بتستخدم أسماء مستمدة من التسمية الإنجليزية:

في ليبيا زمن حكم القذافي

السنة الأولى في التقويم الغريغوري في ليبيا هي سنة وفاة النبي محمد، و معروفة في ليبيا بأسماء عربية وضعها معمر القذافي بترمز لفصول السنة و بعض الشخصيات التاريخية و هي: