Wìkìpedia ìre nsaikilopedia (ikpele ikpa ifuk-ibot) eyi ene geelek môkọtbe igọọk ige mè ìre itap inu isọkọ me lek. Ọmọ omin ichit me etete ebi kè akpatan̄ etip ekisa iweek ifuk-ibot ofolek inu geelek me lek njin-etip [world wide web]. Ọmọ si ore ge me lek akọp akpatan̄ iba ìsisibi isi ichit igọọk me lek etip ebi Alexa enyibe me emen Onyan̄-ita me 2015. Otutuuk inu òkup me Wìkìpedia ìre ọsọ; kpekinyam ewe si me emen akpatan̄-etip kiban̄. Wìkìpedia ìre ebi Wikimedia Foundation ekaan̄; îre uwu-mbubek eyi kpesa iweek oruru; ikpoko ekisa ikpọ chieen̄ me lek ìkinan̄a me inyinyi echi ebi ene ekiche inyi uwu ikwaan̄ yi.
Echili akpatan̄ etip Wìkìpedia me 15 Onyan̄-ge me 2001 inan̄a me ubọk kè Jimmy Wales mè Larry Sanger. 'Sanger' onyi Wìkìpedia erieen̄ ya. Wiki ìre ikọ me usem 'Hawai' òsisibi "ugwat ugwat" sà pedia onan̄a me lek encyclopedia me usem ebeke òrere "ikpele ikpa ifuk-ibot." Adasi mgbọ echilibe akpatan̄ etip ya, ege inu me usem uket-chieen̄ gaalek. Ire, me ikafiin̄ge, akpatan̄ echi esese otu usem îsibi si. Mgbọ keyi, esese akpatan̄ Wìkìpedia mîkup me inu òwawa iraka efit usem ita. Ire, akpatan̄ eyi usem uket-chieen̄ omin ichit me otutuuk kiban̄ mije îkaan̄ etip ifuk-ibot [articles] òwawa iraka efie gweregwen mè ọkpọkọ ge [6.1 million]. Otutuuk etip ifuk-ibot òkukup me otutuuk ebi kè Wìkìpedia me esese usem cha mîgbaan̄ iwa iraka akọp efie ge mè efie iba. Ebi ìkinu me lek akpatan̄ ya iniweek ifuk-ibot me onyan̄ me onyan̄ mîwa iraka efie ene go mè ọkpọkọ go [1.5 billion].
'Jimmy Wales' ìtumu ibe ke Wìkìpedia ìre ntọ-lek inanama ikpele ikpa ifuk-ibot egebe inwọn mè irọrọ inyi ire ubọk otutuuk ene me linyọn̄ me otu usem kiban̄.