Nkube (òrere si Okube) ìre anam ijon̄ òkup me ọgbọn̄ ge mèlek ebi kè okpọk. Inu ge òsisibi esese me lek kiban̄ ìre esese esese unwen ema ekaan̄be mè irọ si inyi itoon̄ me lek kiban̄. Usini kiban̄ îre oke unwen ya onin̄be chieen̄ ire gaalek ke ema ekikọt inwene, ire, usini mîkikọt inwene inan̄a me unwene ge inin̄ me ofifi unwen, mêkọt si igwugwa unwen (njiik, unwan, geren̄, oluku mè ofifi)
Inu òsibi esese melek kiban̄ ire: ukot kiban̄ òkakaan̄ otukot, ujọn̄ọ edim kiban̄ eyi ema ekikot isa itet inu, akparalek kiban̄ òsisip me agba mè ibene me inyọn̄, nchiaak nchiaak ibot kiban̄, alọm kiban̄ eyi òkikọt iwọọk ijọn̄ọ isibi mgbọ yaage mè iyaka igwu ikom, ike ema ekije ije kiban̄, mè ifa mè ìre ìkò òkup me inyọn̄ ujon̄ọ otu kiban̄.
Chieen̄ iba kè nkube ìkije esese esese; kpekigbaan̄ ije. Mije keya, mgbọ geelek, nden̄ nkube ìkifuk ibot ifo me lek esese esese ogugo iba îmun̄be me ere îkupbe. Mgbọ ibotet inorie kan̄, chieen̄ iba kan̄ cha mêgbaan̄ ije inyi isa me ikeya igwuun̄ chieen̄ ibọm urie.