Wn/shn/ႁိူဝ်းမိၼ်ႁႄႇလီၶွပ်ႇတႃႇ ၵျႃႇပၢၼ်ႇ လုတူၵ်းၼႂ်းပၢင်ႇလၢႆႇ တၢႆၼိုင်ႈၵေႃႉ ႁၢႆၸဵတ်းၵေႃႉ

ဝၼ်းဢႃးတိတ်ႉ၊ ဢေႇပရႄႇ 21၊ 2024 

ႁိူဝ်းမိၼ်ႁႄႇလီၶွပ်ႇတႃႇ ၵျႃႇပၢၼ်ႇ

ႁိူဝ်းမိၼ်ႁႄႇလီႇၶွပ်ႇတႃႇ တပ်ႉၼမ်ႉၵျႃႇပၢၼ်ႇ ဢၼ်တၢင်ႇၽူႈႁၢပ်ႇၵၢၼ်ၵႂႃႇ ပႅတ်ႇၵေႃႉၼၼ်ႉ ၽွင်းမိူဝ်ႈတိုၵ်ႉၽိုၵ်းၵၢၼ်မိၼ် တွၼ်ႈၶမ်ႈ ၼၼ်ႉ လႆႈလုတူၵ်းၵႂႃႇတီႈၼႂ်း သမုတ်ႉတရႃႇပၸိၽိၵ်ႉ ဢၼ်မီး ၽၢႆႇၸၢၼ်း ဝဵင်းတူဝ်ႇၵျူဝ်ႇၼၼ်ႉလႄႈ ၽွင်းလူင်ၵၢၼ်ၵႅတ်ႇၵင်ႈၵျႃႇပၢၼ်ႇ လႆႈမွၵ်ႇလၢတ်ႈ မိူဝ်ႈဢေႇပရႄႇ 21 ၼၼ်ႉဝႃႈ ႁိူဝ်းမိၼ်ႁႄႇလီႇၶွပ်ႇတႃႇသွင်လမ်းၼၼ်ႉ လႅပ်ႈတေ ၽႃႇၺႃးၵၼ် ဝႃႈၼႆယဝ်ႉ။

ၸဝ်ႈၼႃႈတီႈၶဝ် လႆႈယိုၼ်ယၼ်ဝႃႈ ၽူႈႁၢပ်ႇၵၢၼ်ၵေႃႉၼိုင်ႈ ဢၼ်ၽိူဝ်းဢဝ်လႆႈၼႂ်းၼမ်ႉၼၼ်ႉတႄႉ လႆႈတၢႆၵႂႃႇယဝ်ႉၼႆသေ ၽူႈၽူတ်ႇၸွႆႈၶဝ် တိုၵ်ႉဢွၼ်ၵၼ် ႁႃ ၽူႈႁၢပ်ႇၵၢၼ်ၸဵတ်းၵေႃႉ ဢၼ်ႁၢႆၵႂႃႇၼၼ်ႉယူႇ ဝႃႈၼႆ။

ၽွင်းလူင်ၵၢၼ်ၵႅတ်ႇၵင်ႈၵျႃႇပၢၼ်ႇ မိၼူဝ်ရု ၵိႁႃရ လႆႈမွၵ်ႇ ၽူႈဢဝ်ၶၢဝ်ႇၶဝ်ဝႃႈ မိူဝ်ႈဢေႇပရႄႇ 20 ၼၼ်ႉ ဢၼ်ပဵၼ် ႁိူဝ်းမိၼ် ႁႄႇလီႇၶွပ်ႇတႃႇ မဵဝ်း SH-60K ၶွင် တပ်ႉၼမ်ႉၵႅတ်ႇၵင်ႈၵျႃႇပၢၼ်ႇ သွင်လမ်းၼႆႉ လႆႈတၢင်ႇ ၽူႈႁၢပ်ႇၵၢၼ် ၼိုင်ႈလမ်း သီႇၵေႃႉသေ လႆႈမိၼ်မႃးယဝ်ႉ ထိုင်တီႈႁိမ်း ၵုၼ်တူဝ်ရိသျိမ ဢၼ်မီးၽၢႆႇၸၢၼ်း ဝဵင်းတူဝ်ႇၵျူဝ်ႇ ယၢၼ် 600 ၵီႇလူဝ်ႇမီႇတႃႇၼၼ်ႉ လွင်ႈၵပ်းသိုပ်ႇ လႆႈၶၢတ်ႇၵႂႃႇ ဝႃႈၼႆယဝ်ႉ။

ၵိႁႃရ လၢတ်ႈဝႃႈ ယၢမ်းၽွင်းတေႃႈလဵဝ်တႄႉ လွင်ႈတၢင်း ဢၼ်လႆႈပဵၼ်ၵႂႃႇၼၼ်ႉ ဢမ်ႇပႆႇလႆႈႁူႉသင်သေတႃႉ ႁိူဝ်းမိၼ်ႁႄႇလီႇၶွပ်ႇတႃႇသွင်လမ်းၼၼ်ႉ မိူဝ်ႈပႆႇလုတူၵ်းၼႂ်းၼမ်ႉၼၼ်ႉ လႅပ်ႈၶဝ်တေ ၽႃႇၺႃးၵၼ် ဝႃႈၼႆယဝ်ႉ။

ၽူႈၽူတ်ႇၸွႆႈၶဝ် လႆႈႁၼ် ၶိူင်ႈတၢင်ႇမၢႆတွင်းလွင်ႈၵၢၼ်မိၼ် ဢၼ်ၼိုင်ႈ ၵႃႈတီႈ ႁိူဝ်းမိၼ်ႁႄႇလီႇၶွပ်ႇတႃႇသွင်လမ်းၼၼ်ႉလႄႈ ယွတ်ႈၽတ်ႉလူမ်းၼိုင်ႈဢၼ်၊ ၶိူင်ႈၶူဝ်းပွတ်းတွၼ်ႈ ၶွင် ႁိူဝ်းမိၼ်ႁႄႇလီႇၶွပ်ႇတႃႇၸိူဝ်းၼၼ်ႉ တီႈလဵဝ်ၵၼ်ၼႆလႄႈ ၵိႁႃရ လၢတ်ႈဝႆႉ ၼႆႉမၼ်းပဵၼ် ၽၢင်ႁၢင်ႈ လႆႈဝႃႈ ႁိူဝ်းမိၼ်သွင်လမ်းၼႆႉ ၶဝ်မိၼ်ၸမ်ၵၼ်မႃး ဝႃးၼႆယဝ်ႉ။ တွၼ်ႈတႃႇယိုၼ်ယၼ်လႆႈ လွင်ႈတၢင်း ဢၼ်ႁိူဝ်းမိၼ်လႆႈလုတူၵ်းၼၼ်ႉ ၽူႈမီးပုၼ်ႈၽွၼ်းၶဝ် တိုၵ်ႉ ၸႅၵ်ႇထတ်းသၢင် ၶေႃႈမုၼ်း ဢၼ်ၵဵဝ်ႇၵပ်း သၢႆၵၢၼ်မိၼ်ၼၼ်ႉယူႇ ဝႃႈၼႆယဝ်ႉ။

တွၼ်ႈတႃႇသွၵ်ႈႁႃၽူတ်ႇၸွႆႈ ၽူႈႁၢပ်ႇၵၢၼ် ၸိူဝ်းဢၼ်ႁၢႆဝႆႉၼၼ်ႉ တပ်ႉၵႅတ်ႇၵင်ႈၵျႃႇပၢၼ်ႇ (MSDF) လႆႈပွႆႇ ႁိူဝ်းသိုၵ်း ပႅတ်ႇလမ်း လႄႈ ႁိူဝ်းမိၼ်ႁႃႈလမ်းဝႆႉယဝ်ႉ။

ႁႄႇလီႇၶွပ်ႇတႃႇ SH-60K ဢၼ်သႂ်ႇဢႅၼ်ႇၵျိၼ်ႇသွင်လုၵ်ႈ ဢၼ်ႁၢပ်ႇၵၢၼ်လႆႈတီႈ လၢႆလၢႆမဵဝ်းၼၼ်ႉ ၵူၼ်းႁူႉၼမ်ဝႃႈ ပဵၼ် Seahawks ၼႆသေ လုၵ်ႉတီႈ ၶွမ်ႇပၼီႇ Sikorsky သၢင်ႈဝႆႉသေ ၵၢၼ်ငၢၼ်းပၢႆးၸၢၵ်ႈလူင် မိသ်ႉသူႇပီႇသျီႇ လႆႈၶိုၼ်းမႄးၵုမ်း ႁဵတ်းဢွၵ်ႇဝႆႉ တီႈၼႂ်းမိူင်းယဝ်ႉ။

ၽွင်းလူင်ၵၢၼ်ၵႅတ်ႇၵင်ႈ ၵိႁႃရ မွၵ်ႇလၢတ်ႈဝႃႈ ႁႄႇလီႇၶွပ်ႇတႃႇၸိူဝ်းၼၼ်ႉ ၽွင်းတိုၵ်ႉ ၽိုၵ်းၵၢၼ်ယႃႉႁိူဝ်းသၢင်းၽေႃးလမ်ၼမ်ႉ တွၼ်ႈၶမ်ႈ ၶၢဝ်းယၢမ်းပိုၼ်ႉတီႈ တွၼ်ႈၶမ်ႈ 10 မူင်း 38 မိၼိတ်ႉၼၼ်ႉ လွင်ႈၵပ်းသိုပ်ႇလႆႈၶၢတ်ႇၵႂႃႇသေ ႁိုင်ၼိုင်ႈမိၼိတ်ႉမႃး လႆႈသူင်ႇသၼ်ယၢၼ်း လွင်ႈၶိုၵ်ႉၶၢၵ်ႈ ႁင်းမၼ်းမႃး ဝႃႈၼႆႉယဝ်ႉ။

ငိူၼ်ႈငဝ်ႈတိုၼ်း

• Kyodo News. "2 Japan SDF choppers crash during drill leaving 1 dead, 7 missing" — Kyodo News, April 21, 2024
• The Associated Press. "2 Japanese navy helicopters crash in the Pacific Ocean during training, leaving 1 dead and 7 missing" — NBC News, April 21, 2024
• Kathleen Benoza and Jesse Johnson. "At least one dead, seven missing after two MSDF helicopters crash off Izu Islands" — The Japan Times, April 21, 2024
• Agence France-Presse. "Japan navy helicopters crash, leaving one dead and seven missing" — The Guardian, April 21, 2024