Wn/shn/ၸွမ်ၽွင်းလူင်မိူင်းၵျႃႇပၢၼ်ႇ ပိုၼ်ၽၢဝ်ႇဝႃႈ တေဢမ်ႇၶဝ်ႈပၢင်လိူၵ်ႈတင်ႈထႅင်ႈ

ဝၼ်းၽတ်း၊ ဢေႃးၵၢတ်ႉ 15၊ 2024 

ၸွမ်ၽွင်းလူင် မိူင်းၵျႃႇပၢၼ်ႇ ၽူႇမီႇယူဝ်ႇ ၶိသျိတႃႇ

မိူဝ်ႈၼႆႉ လိူၼ်ဢေႃးၵၢတ်ႉ 14 ဝၼ်းၼၼ်ႉ ၸွမ်ၽွင်းလူင် ၵျႃႇပၢၼ်ႇ Fumio Kishida ၵိုင်ႉၵၢင်ႉပိုၼ်ၽၢဝ်ႇဝႃႈ မၼ်းတေဢမ်ႇၶဝ်ႈၶႄႉၶဵင်ႇ ပၢင်လိူၵ်ႈတင်ႈ ၽူႈဢွၼ်ႁူဝ်မႂ်ႇ ၼႂ်းပႃႇတီႇ ဢၼ်တေၸတ်းႁဵတ်း ၼႂ်းလိူၼ်သႅပ်ႇထႅမ်ႇပႃႇၼၼ်ႉလႄႈ တေလႆႈလိူၵ်ႈ ၸွမ်ၽွင်းလူင် ၵျႃႇပၢၼ်ႇ ၵေႃႉမႂ်ႇ ၼႆယဝ်ႉ။

ဝၢႆးသေ ၶိသျိတႃႇ လႆႈထုၵ်ႇလိူၵ်ႈပဵၼ် ၽူႈဢွၼ်ႁူဝ် ပႃႇတီႇ LDP ဢၼ်ဢုပ်ႉပိူင်ႇၽွင်းငမ်းဝႆႉ မိူဝ်ႈပီ 2021 ၼၼ်ႉယဝ်ႉ ဢႃႇယု ၸွမ်ၽွင်းလူင် ၶၢဝ်းတၢင်း 3 ပီ တေယဝ်ႉတူဝ်ႈၵႂႃႇ ၼႂ်းလိူၼ်သႅပ်ႇထႅမ်ႇပႃႇ ၼႆယဝ်ႉ။

ယွၼ်ႉမၼ်းတေဢမ်ႇလိူၵ်ႈပဵၼ် ၽူႈၼမ်းၼႂ်းပႃႇတီႇလႄႈ ၽူႈၼမ်းမႂ်ႇ ဢၼ်ပႃႇတီႇ LDP ဢၼ်မီးဢႃႇၼႃႇၼိူဝ် ၼႂ်းသၽႃးတင်းသွင်သၽႃးၼၼ်ႉ လိူၵ်ႈဝႆႉၼၼ်ႉၵေႃႈ တေလႆႈဢဝ်ပႃးပုၼ်ႈၽွၼ်း ၸွမ်ၽွင်းလူင် ၼႆယဝ်ႉ။

ၸွမ်ၽွင်းလူင် ၶိသျိတႃႇ ဢၼ်လႆႈထူပ်းၺႃး လွင်ႈၵိၼ်ငိုၼ်း ၼႂ်းပႃႇတီႇၼၼ်ႉ လွင်ႈၵမ်ႉထႅမ် လႆႈတူၵ်းလူင်းမႃးသေ ယၢမ်းလဵဝ် လွင်ႈၵမ်ႉထႅမ် ၵူၼ်းမိူင်း ဢမ်ႇတဵမ် 20% ၼႆယဝ်ႉ။

ၸွမ်ၽွင်းလူင် လၢတ်ႈဝႃႈ လွင်ႈဢၼ်မၼ်းလႆႈထွၼ်တူဝ်ဢွၵ်ႇ တီႈၼႃႈတီႈမၼ်းၼႆႉ ၼႄဝႃႈ ပႃႇတီႇမၼ်း ဝႆႉၼၵ်းၼိူဝ် လွင်ႈၵိၼ်ငိုၼ်း ၼႂ်းပႃႇတီႇ ဢၼ်ပဵၼ်ယူႇၼႆႉသေ တေႁဵတ်းသၢင်ႈ လွင်ႈမူၼ်ႉမႄး ၼႆသေ လၢတ်ႈဝႃႈ တေၵမ်ႉထႅမ် ပၼ်ႁႅင်း ၸွမ်ၽွင်းလူင်မႂ်ႇ ဢၼ်တေ ၶိုၼ်ႈမႃးၼၼ်ႉ ဝႃႈၼႆယဝ်ႉ။

လွင်ႈဢၼ်မၼ်းၸဝ်ႈ လႆႈထွၼ်တူဝ်ဢွၵ်ႇၼႆႉ ပဵၼ်ယွၼ်ႉ ပႃႇတီႇ LDP လႆႈသုမ်းပၢင်လိူၵ်ႈတင်ႈ ၼႂ်းပိုၼ်ႉတီႈ မိူဝ်ႈတွၼ်ႈၸဝ်ႉပီၼႆႉလႄႈ ဢႃႇၼႃႇမၼ်း ၼႂ်းပႃႇတီႇ ယွမ်းလူင်းၵႂႃႇသေ ၼႂ်းပႃႇတီႇၼၼ်ႉ လႆႈဢုပ်ႇၵၼ်ဝႃႈ လူဝ်ႇလႆႈလႅၵ်ႈလၢႆႈ ၽူႈဢွၼ်ႁူဝ် ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Mari Yamaguchi. "Kishida will not seek another term, meaning Japan will get a new prime minister in September" — AP News, August 15, 2024
• Associated Press. "Japan's PM Kishida announces he will not run in September" — VOA News, August 15, 2024
• ALICE FRENCH, TAMAYO MUTO and YUICHI SHIGA. "Japan's ruling LDP to vote on Kishida successor: 5 things to know" — Nikkei, August 15, 2024
• Tim Kelly and Sakura Murakami. "Japan's Prime Minister Kishida to resign, paving way for new leader" — Reuters, August 15, 2024
• News Wires. "Japanese PM Kishida announces he will not seek re-election in September" — France24, August 15, 2024
• Huaxia. "Japan PM Kishida to step down, not running for ruling LDP president" — Xinhua, August 15, 2024