ဝၼ်းသုၵ်း၊ ၸူႇလၢႆႇ 19၊ 2024
ယွၼ်ႉပိူဝ်ႈ ဢႅပ်ႉၶွမ်း Microsoft လႄႈ ၵၢၼ်ၸႂ်ႉတိုဝ်း ၼႂ်းလုမ်ႈၾႃႉ ၵိုင်ႉၵၢင်ႉၵိုတ်းယင်ႉၵႂႃႇ မိူဝ်ႈၼႆႉလႄႈ ယေးငိုၼ်း၊ လွၵ်းလၢႆးပၼ်ငိုၼ်း၊ သၢႆၾူၼ်း၊ ၵၢၼ်ပွႆႇသဵင် လႄႈ ၵၢၼ်တေႃႉသူင်ႇ ၸိူဝ်းၼႆႉ ႁူပ်ႉလွင်ႈယၢပ်ႇၽိုတ်ႇ ႁၢဝ်ႈႁႅင်းသေ တိုၵ်ႉၶတ်းၸႂ်ၵႄႈလိတ်ႈယူႇ ၼႆယဝ်ႉ။
ၶွမ်ႇပၼီႇ Microsoft လၢတ်ႈဝႃႈ ယွၼ်ႉပိူဝ်ႈ ႁဵတ်း Update ပၼ် ပရူဝ်ႇၵရႅမ်ႇ ဢၼ်ႁႄႉၵင်ႈ မႅင်းဝၢႆးရၢတ်ႉသ် ၼႂ်းၶွမ်းလႄႈ ၸင်ႇလႆႈ တႅၵ်ႇယၢႆႈၵႂႃႇ ၼႆယဝ်ႉ။ ၼႂ်းၶၢဝ်းတၢင်းသွင်ပီၼႆႉ ၶွမ်ႇပၼီႇ Microsoft လႆႈႁူပ်ႉထူပ်း လွင်ႈယၢပ်ႇၽိုတ်ႇ ၽၢႆႇပၢႆးၸၢင်ႈ ဢၼ်ႁၢဝ်ႈႁႅင်းလိူဝ်ပိူၼ်ႈ။ လွင်ႈမႄးၵုမ်းလုမ်းလႃး ဢၼ်လူဝ်ႇၼၼ်ႉ တိုၵ်ႉႁဵတ်းယူႇလႄႈ ငဝ်းလၢႆးမၼ်းၵေႃႈ လီယူႇၼႆ ၶွမ်ႇပၼီႇ Microsoft တႅမ်ႈဝႆႉ တီႈၼိူဝ် သိုဝ်ႇသၢၼ်တူင်ႇၵူၼ်း X ၼၼ်ႉယဝ်ႉ။ ယွၼ်ႉပၼ်ႁႃၼႆႉသေ လွၵ်းလၢႆးၵူတ်ႇထတ်း တီႈၶူင်ႇႁိူဝ်းမိၼ် ၼႂ်းလုမ်ႈၾႃႉ တင်းမူတ်း လႆႈၵိုတ်းယင်ႉၵႂႃႇသေ လွင်ႈႁဵတ်းၵၢၼ် လႆႈယွမ်းလူင်းၵႂႃႇ။ မိူဝ်ႈၸဝ်ႉၸဝ်ႉၼၼ်ႉ ၶွမ်ႇပၼီႇႁိူဝ်းမိၼ်လူင် ဢမႄရိၵၢၼ်ႇၶဝ် လႆႈၵိုတ်းယိုတ်း လွင်ႈၶီႇႁိူဝ်းမိၼ်ၶဝ်။ တီႈမိူင်းဢေႃႉသထရေးလီးယႃးၼၼ်ႉ ယွၼ်ႉဢိၼ်ႇတႃႇၼႅတ်ႉ ပတ်းပိုၼ်ႉၸိုင်ႈမိူင်းလႄႈ ၵၢၼ်လူင်ပွင်ၸိုင်ႈ ဢိၵ်ႇပႃး ၵၢၼ်ပၢႆးမၢၵ်ႈမီး တၢင်ႇၸိူဝ်းၵေႃႈ တုမ်ႉတိူဝ်ႉသေဢမ်ႇၵႃး လႆႈၵိုတ်းယိုတ်း လွင်ႈၶီႇႁိူဝ်းမိၼ် ၼႆ ၶၢဝ်ႇငၢဝ်းဢွၵ်ႇမႃးၼင်ႇၼႆ။
မၢႆႉၶရူဝ်ႇသွပ်ႉၾ် လၢတ်ႈဝႃႈ ၶဝ်တိုၵ်ႉၶတ်းၸႂ်ၵႄႈလိတ်ႈ လွင်ႈလႆႈၶၢတ်ႇၵႂႃႇယူႇၼႆသေ ႁႃႁၼ်လွင်ႈတၢင်းမၼ်းယဝ်ႉလႄႈ တိုၵ်ႉႁဵတ်းသၢင်ႈ တႃႇတေၶိုၼ်းမႄးၸႂ်ႉတိုဝ်း ၵၢၼ်ၸွႆႈသၢင်ႈ မိူၼ်ၵဝ်ႇယူႇ ၼႆယဝ်ႉ။
ငိူၼ်ႈငဝ်ႈၶၢဝ်ႇ
- Helen Regan, Jessie Yeung, Kathleen Magramo, Olesya Dmitracova, Christian Edwards, Sana Noor Haq, Eric Levenson, Adrienne Vogt and Christina Zdanowicz. "Airlines and businesses struggle to recover following global Microsoft outage" — CNN, July 19, 2024
- NBC News. "Major global IT outage grounds flights, hits banks and businesses around the world" — NBC News, July 19, 2024
- The Washington Post. "Major airlines, medical systems affected by mass IT outage for Windows users" — The Washington Post, July 19, 2024
- Cnbc. "‘Largest IT outage in history’ leaves world reeling" — CNBC, July 19, 2024
- Alexander Smith and Kevin Collier. "What we know about the global Microsoft outage" — NBC News, July 19, 2024
