ဝၼ်းၽတ်း၊ ၾႅပ်ႇဝႃႇရီႇ 29၊ 2024
တပ်ႉသိုၵ်းဢမႄႇရိၵၢၼ်ႇ လၢတ်ႈဝႃႈ မိူဝ်ႈဝၼ်းထိ 27 ဝၢႆးဝၼ်းၼၼ်ႉ ဢမႄႇရိၵၢၼ်ႇ လႄႈ ၸုမ်းဢူၺ်းလီၶဝ် လႆႈပိုတ်းယိုဝ်း တရုၼ်း 5 ဢၼ် ၶွင် ၵူၼ်းထိူၼ်ႇႁူႇတီႇ ဢၼ်ပၵ်းသဝ်းတီႈၼႂ်း မိူင်းယႄႇမႅၼ်ႇ ၼၼ်ႉ ဝႃႈၼႆယဝ်ႉ။ ထၢၼ်ၵုမ်းၵမ်ၼႃႈလိၼ် တွၼ်ႈၵၢင် ဢမႄႇရိၵၢၼ်ႇ မွၵ်ႇလၢတ်ႈဝႃႈ လုၵ်ႉတီႈ ၼႂ်းမိူင်းယႄႇမႅၼ်ႇ ဢၼ်ၵူၼ်းထိူၼ်ႇႁူႇတီႇ ဢၼ်ဢီႇရၢၼ်းၶဝ် ၵမ်ႉထႅမ်ပၼ်ႁႅင်းဝႆႉ ၼၼ်ႉသေ ပိုတ်းယိုဝ်းမႃးဝႃႈၼႆယဝ်ႉ။
တရုၼ်းၸိူဝ်းၼႆႉ မၼ်းမီးၽေးၶဵၼ်တွၼ်ႈတႃႇ ႁိူဝ်းတၢင်ႇၵုၼ်ႇ၊ တပ်ႉၼမ်ႉဢမႄႇရိၵၢၼ်ႇ လႄႈ ႁိူဝ်းၸုမ်းဢူၺ်းလီၶဝ်လႄႈ ၸင်ႇလႆႈပိုတ်းယိုဝ်းတူၵ်းပဵၼ် ၼင်ႇၼႆယဝ်ႉ ဝႃႈၼႆ။ ဢမႄႇရိၵၢၼ်ႇ လႄႈ တပ်ႉဢူၺ်းလီၶဝ်ၼႆႉ ၶဝ်တိုၵ်း ၵူၼ်းထိူၼ်ႇႁူႇတီႇ ဢၼ်တိုၵ်းႁိူဝ်းသၢင်းၽေႃး ၸိူဝ်းမီးယူႇတီႈ ပၢင်ႇလၢႆႇလႅင်ၼၼ်ႉ မီးမႃး ႁူဝ်လိူၼ်မၼ်းယဝ်ႉ။ ၵူၼ်းထိူၼ်ႇႁူႇတီႇၶဝ်လၢတ်ႈဝႃႈတႄႉ လွင်ႈဢၼ်ၶဝ်တိုၵ်းယူႇၼႆႉ ပဵၼ်လွင်ႈဢၼ်ၶဝ်ၶႂ်ႈၼႄဝႃႈ ၶဝ်မီးလွင်ႈၽွမ်ႉႁူမ်ႈ ၼမ်ႉၼိုင်ႈၸႂ်လဵဝ်ၵၼ်တင်း ပႃးလဵတ်ႈသတၢႆး ဢၼ်မီးယူႇတီႈ ၵႃႇၸႃႇၼၼ်ႉ ဝႃႈၼႆယဝ်ႉ။
ယွၼ်ႉပိူဝ်ႈလွင်ႈတိုၵ်းယိုဝ်းၼႆႉလႄႈ ၸိူဝ်းပဵၼ် ၶွမ်ႇပၼီႇႁိူဝ်းတင်းၼမ်ၼႆႉ ဢွၼ်ၵၼ်ဝႄႈ သၢႆတၢင်း ပၢင်ႇလၢႆႇလႅင်သေၵေႃႈ ဢွၼ်ၵၼ် ၸႂ်ႉသၢႆတၢင်း ဢႃႇၾရိၵ ဢၼ်တိူဝ်းၶၢဝ်းတၢင်းၵႆ ဢၼ်တိူဝ်းၵဵင်ႈငိုၼ်းၼမ်ၼၼ်ႉယဝ်ႉ။ ၶွမ်ႇပၼီႇ ၽၢႆႇႁူမ်ႇလူမ်ႈ သၢႆၼမ်ႉလၢတ်ႈဝႃႈ လွင်ႈပိုတ်းယိုဝ်း ဢၼ်ပဵၼ်မိူဝ်ႈ ဝၼ်းထိ 27 ၼၼ်ႉ ပဵၼ်တီႈ ၽၢႆႇတူၵ်းတႃႈႁိူဝ်း Hodeida မိူင်းယႄႇမႅၼ်ႇ ယၢၼ် 110 ၵီႇလူဝ်ႇမီႇတႃႇၼၼ်ႉဝႃႈၼႆယဝ်ႉ။
ငိူၼ်ႈငဝ်ႈတိုၼ်း edit
- VOA News. "US Military Reports Destroying 5 Houthi Drones" — VOA News, February 28, 2024
- VOA News. "ဟူသီအဖွဲ့ပစ်လိုက်တဲ့ အဝေးထိန်းဒရုန်း ၅ ခု ကန် နဲ့ မဟာမိတ်တွေ ပင်လယ်နီမှာ ပစ်ချ" — VOA News, February 28, 2024
