ဝၼ်းၽတ်း၊ ဢေႃးၵၢတ်ႉ 15၊ 2024
ႁွင်ႈၵၢၼ်ၽၢႆႇၼွၵ်ႈမိူင်း ဢမႄႇရိၵၢၼ်ႇၶဝ် ပိုၼ်ၽၢဝ်ႇဝႆႉ မိူဝ်ႈဢေႃးၵၢတ်ႉ 13 ဝၼ်းၼၼ်ႉဝႃႈ လႆႈမၵ်းမၼ်ႈယိုၼ်ယၼ် တႃႇတေၶၢႆပၼ် ၶိူင်ႈၵမ်ႉၵႅမ် ၵၢၼ်သိုၵ်း ဢၼ်ၵိုင်ႇငိုၼ်း တေႃႇလႃႇ 20 ပီႇလီႇယၼ်ႇ တီႈမိူင်းဢိတ်ႇသရေး ပႃးၸဵမ် ႁိူဝ်းမိၼ်တိုၵ်း ၸႅတ်ႉ လႄႈ မၢၵ်ႇၼူၾႆး ဢၼ်ၶိုတ်းၵၢပ်ႈ ဢၼ်လုၵ်ႉၼိူဝ်ၵၢင်ႁၢဝ် ယိုဝ်းၵႂႃႇၼိူဝ်ၵၢင်ႁၢဝ်ၼၼ်ႉ ၼႆယဝ်ႉ။
ၶွၼ်ႇၵရႅတ်ႉ လႆႈႁူႉၸွမ်း ၽႅၼ်ၵၢၼ် တႃႇတေၶၢႆပၼ် ၶိူင်ႈၵွင်ႈၵၢင်ႇ ၵၢၼ်သိုၵ်း ပၼ် ဢိတ်ႇသရေး ၶဝ်ႈပႃး ၸိူဝ်းပဵၼ် ႁိူဝ်းမိၼ်တိုၵ်း F-15 50 လမ်းလိူဝ်၊ မၢၵ်ႇၼူၾႆးထၢၼ်ႈၵၢင် ဢၼ်ၶိုတ်းၵၢပ်ႈ ဢၼ်ႁွင်ႉဝႃႈ AMRAAM ဢၼ်လုၵ်ႉၼိူဝ်ၵၢင်ႁၢဝ် ယိုဝ်းၸူးလႆႈၼိူဝ်ၵၢင်ႁၢဝ်၊ မၢၵ်ႇတႅင်ႉ 120mm ဢိၵ်ႇပႃး မၢၵ်ႇႁိၼ်ၸိုၼ်းယၢမ်း ဢၼ်ၸၢင်ႈတႅၵ်ႇႁႅင်း လႄႈ ၵႃးႁႄႉၵင်ႈ ၽၢႆႇၼႃႈ ၼႆယဝ်ႉ။ ယဝ်ႉၵေႃႈ လွင်ႈၶၢႆၶိူင်ႈၸိူဝ်းၼႆႉ ပဵၼ်မိူဝ်ႈၽွင်း ဢိတ်ႇသရေး တိုၵ်ႉမီးသၢႆငၢႆ တႃႇႁၢင်ႈပၢင်တိုၵ်း ဢၼ်ၵႂၢင်ႈၶႂၢင်လိူဝ် တီႈ ပွတ်းဢွၵ်ႇ တွၼ်ႈၵၢင် ၼၼ်ႉယူႇ။
ၵူၺ်းၵႃႈ ၶိူင်ႈသိုၵ်း ဢၼ်တေၶၢႆမိူဝ်ႈလဵဝ်ၼႆႉ ဢမ်ႇၸႂ်းဝႃႈ တေၽႅဝ်မႃးတီႈ ဢိတ်ႇသရေးၵမ်းလဵဝ်သေတႃႉ တေလႆႈၸႂ်ႉၶၢဝ်းယၢမ်း ႁူဝ်ပီမၼ်း တႃႇတေႁဵတ်းၸွမ်း ၶေႃႈတူၵ်းလူင်း ဢၼ်လႆႈတူၵ်းလူင်းၵၼ်ဝႆႉၼၼ်ႉယူႇ။ ၶိူင်ႈၵွင်ႈၵၢင်ႇ ဢၼ်တေၶၢႆမိူဝ်ႈလဵဝ်ၼႆႉ ပဵၼ်ၶိူင်ႈၵွင်ႈၵၢင်ႇ ဢၼ်တေႁဵတ်းႁႂ်ႈ ဢဵၼ်ႁႅင်းသိုၵ်း ဢိတ်ႇသရေး တိူဝ်းၶိုၼ်ႈမႃး ၶၢဝ်းယၢဝ်းၼၼ်ႉသေ လႆႈလၢမ်းၶၢတ်ႈဝႆႉဝႃႈ ၼႂ်းပီ 2026 ၼႆႉ တေၸၢင်ႈတႄႇသူင်ႇပၼ် ဢိတ်ႇသရေးလႆႈ တီႈၸဝ်ႉသုတ်း ၼႆယဝ်ႉ။
ၽူႈတႅၼ်းၽွင်း ဢမႄႇရိၵၢၼ်ႇ တင်း ၵူၼ်းမိူင်းၵမ်ႉပႃႈၼမ် ဢွၼ်ၵၼ် တုၵ်းယွၼ်းဝႃႈ ယွၼ်ႉၵူၼ်းမိူင်း လႆႈတၢႆၼမ် ၼႂ်းပၢင်တိုၵ်း ၵႃႇၸႃႇလႄႈ ႁႂ်ႈလူတ်းယွမ်း လွင်ႈၸွႆႈထႅမ် ၽၢႆႇသိုၵ်း တီႈဢိတ်ႇသရေး ၼႆယဝ်ႉ။ ယွၼ်ႉၵူၼ်းမိူင်းတုၵ်းယွၼ်းလႄႈ လူင်ပွင်ၸိုင်ႈ ၸွမ်ပွင်ၸိုင်ႈ ၵျူဝ်းပၢႆႇတႅၼ်ႇ လႆႈဝူၼ်ႉသွၼ်ႇတႃႇတေၶၢႆပၼ် ၶိူင်ႈၵွင်ႈၵၢင်ႇပၼ် ဢိတ်ႇသရေး ၼႆယဝ်ႉ။
ငိူၼ်ႈငဝ်ႈၶၢဝ်ႇ
- Tara Copp. "US approves $20 billion in weapons sales to Israel amid threat of wider Middle East war" — AP News, August 14, 2024
- Kanishka Singh and Mike Stone. "US approves sale to Israel of $20 billion weapons package" — Reuters, August 14, 2024
- CBS News. "Biden administration approves $20 billion in weapons, aircraft sales to Israel" — CBS News, August 14, 2024
- Emanuel Fabian, Agencies and Jacob Magid. "US approves $20 billion in weapons sales to Israel, including 50 fighter jets" — The Times of Israel, August 14, 2024
- Haley Britzky and Jennifer Hansler,. "US State Department approves $20 billion potential weapons sales to Israel" — CNN, August 14, 2024
- AFP. "US approves $20 billion weapons package for Israel" — france24, August 14, 2024
