ဝၼ်းဢႃးတိတ်ႉ၊ မၢတ်ႉၶျ် 31၊ 2024
ထၢၼ်ၽွင်းလူင် ၵၢၼ်ၼွၵ်ႈမိူင်း မိူင်းႁူမ်ႈတုမ် ဢမႄႇရိၵၢၼ်ႇ လႆႈပိုၼ်ၽၢဝ်ႇဝႃႈ တေမၵ်းၶၼ်ႈ လွင်ႈၶဝ်ႈမိူင်းဢမႄႇရိ ၼိူဝ် ၽူႈမီးပုၼ်ႈၽွၼ်း ဢၼ်ၵဵဝ်ႇၵပ်း လွင်ႈၶီႇၼဵၵ်းတဵၵ်းတဵင်ၼိူဝ် သုၼ်ႇလႆႈသုၼ်ပဵၼ် လႄႈ လွင်ႈလွတ်ႈလႅဝ်း တီႈ ႁွင်းၵွင်းၼၼ်ႉ ဝႃႈၼႆယဝ်ႉ။ ဝၢႆးသေ လႆႈပိုၼ်ၽၢဝ်ႇ ပၵ်းပိူင်ပၢႆးႁူမ်ႇလူမ်ႈမႂ်ႇ ဢၼ်တိူဝ်းမိပ်ႇငႅၼ်းမၵ်းၶၼ်ႈ သုၼ်ႇလႆႈသုၼ်ႇပဵၼ် တီႇမူဝ်ႇၶရေႇသီႇ တီႈႁွင်းၵွင်းယဝ်ႉၵေႃႈ ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ Antony Blinken လႆႈပိုၼ်ၽၢဝ်ႇ ဝႃႈ ဢမ်ႇႁိုင်ဢမ်ႇၼၢၼ်း တေႁဵတ်း လွင်ႈဢဝ်လိူင်ႈၼင်ႇၼႆယဝ်ႉ ဝႃႈၼႆ။ ၵူၺ်းၵႃႈဝႃႈ တေယိူင်းၸူး ၽူႈမီးပုၼ်ႈၽွၼ်းၵေႃႉလႂ် ၽၢႆႇလႂ်သေ တေမၵ်းၶၼ်ႈ လွင်ႈၶဝ်ႈမိူင်း ဢၼ်ဝႃးၼၼ်ႉတႄႉ ဢမ်ႇႁၼ်လႆႈလၢတ်ႈဝႆႉၸႅင်ႈၸႅင်းလႅင်းလႅင်းၼင်ႇၵဝ်ႇ။
မၼ်းၸီႉၼႄဝႃႈ ပၵ်းပိူင်ပၢႆးႁူမ်ႇလူမ်ႈ ဢၼ်ႁူႉဝႃႈ Article 23 ၼႆႉ မၼ်းပဵၼ်ပၵ်းပိူင်ၵူတ်းမၢႆ တႃႇတေဢဝ်လိူင်ႈလႆႈ ၸိူဝ်းပဵၼ် လွင်ႈႁဵတ်းသၢင်ႈ ႁႂ်ႈသလေႇၼႃႈတႃမိူင်း လႆႈလုၸွမ်း၊ လွင်ႈႁႂ်ႈၶေႃႈလပ်ႉၸိူဝ်းၼႆႉ လႆႈၽႄႈဢွၵ်ႇ၊ ၸိူဝ်းမီး လွင်ႈၵပ်းသိုပ်ႇၵၼ်တင်း ၵူၼ်းၼွၵ်ႈမိူင်း၊ ၵၢၼ်ၼွၵ်ႈမိူင်း ၸိူဝ်းၼႆႉယဝ်ႉ။ တႄႇဢဝ် ပီ 1997 ဢၼ်ဢဝ် ႁွင်းၵွင်း ဢၼ်မီးတႂ်ႈ ပရိတ်ႈတဵၼ်ႇၶဝ် ဢုပ်ႉပိူင်ၼၼ်ႉ ၶိုၼ်းဢၢပ်ႈပၼ် လူင်ပွင်ၸိုင်ႈ မိူင်းၶႄႇလူင်သေ ၸွင်ႇလူင်ပွင်ၸိုင်ႈၶႄႇ ပၼ်ဝႆႉ လွင်ႈလွတ်ႈလႅဝ်း ၸွမ်းၼင်ႇ ဢၼ်ၶဝ်ပၼ် ၶေႃႈမၼ်ႈၵႅၼ်ႇဝႆႉဢၼ်ဝႃႈၼၼ်ႉၼႆ လုၵ်ႉတီႈ ထၢၼ်ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ လႆႈတၢင်ႇလိၵ်ႈထိုင် သၽႃးဢမႄႇရိၵၢၼ်ႇ ၵူႈပီယဝ်ႉ။ ၽွင်းလူင် ၵၢၼ်ၼွၵ်ႈမိူင်း လၢတ်ႈဝႃႈ တီႈၼႂ်း လိၵ်ႈတၢင်ႇလၢတ်ႈပီၼႆႉ မၼ်းၼႄဝႆႉ လွင်ႈၶီႇၼဵၵ်းတဵၵ်းတဵင် ၼိူဝ် ၸုမ်းၵူၼ်းမိူင်း၊ သိုဝ်ႇၶၢဝ်ႇ တီႈ ႁွင်းၵွင်း လႄႈ မီးလွင်ႈတိၺွပ်း ၽၢႆႇသၢၼ်ၶတ်း သေဢမ်ႇၵႃး ၼင်ႇႁိုဝ် ပေႃးတေတိၺွပ်းလႆႈပႃး ၵူၼ်းတူင်ႉၼိုင်လွင်ႈတီႇမူဝ်ႇၶရေႇသီႇ ဢၼ်မီးယူႇၼွၵ်ႈမိူင်းၼၼ် ၸိူဝ်းပဵၼ် ၸဝ်ႈၼႃႈတီႈႁွင်းၵွင်းလႄႈ လူင်ပွင်ၸိုင်ႈ မိူင်းၶႄႇလူင်ၶဝ် ဢွၼ်ၵၼ်တိူဝ်းၶတ်းၸႂ် ႁဵတ်းသၢင်ႈမႃး ဝႃႈၼႆဝႆႉယဝ်ႉ။
ငိူၼ်ႈငဝ်ႈတိုၼ်း
- VOA News. "ဟောင်ကောင် အာဏာပိုင်တွေအပေါ် ကန်ပြည်ဝင်ခွင့် ကန့်သတ်မည်" — VOA News, March 31, 2024
- Cna. "US to restrict visas for 'multiple' Hong Kong officials" — CNA, March 30, 2024
- David Brunnstrom and Kanishka Singh. "US to impose new visa curbs on Hong Kong officials over rights crackdown" — Reuters, March 30, 2024
- Cannix Yau. "Beijing slams US plan to impose visa restrictions on Hong Kong officials over Article 23 law, calling it ‘despicable’ attempt at bullying" — South China Morning Post, March 30, 2024
