ဝၼ်းသုၵ်း၊ မၢတ်ႉၶျ် 29၊ 2024
ၽူႈယႂ်ႇ တပ်ႉသိုၵ်းဢမႄႇရိၵၢၼ်ႇ လႆႈမွၵ်ႇလၢတ်ႈဝႃႈ ၶဝ်ပႆႇလႆႈၵမ်ႉထႅမ်ပၼ် ၶိူင်ႈလၢၵ်ႈၼၢၵ်ႈတင်းသဵင်ႈ ဢၼ်ဢိတ်ႇသရေးၶဝ်ယွၼ်းဝႆႉဝႃႈၼႆယဝ်ႉ၊ ဢိတ်ႇသရေးၶဝ်ၼႆႉ တိုၵ်ႉႁၢင်ႈသိုၵ်းတေႃႇ ၸုမ်းႁႃးမၢတ်ႉသ် ပႃးလဵတ်ႈသတၢႆး တီႈ ၵႃႇၸႃႇၼၼ်ႉယဝ်ႉ။ မၼ်းလႆႈပၼ်တၢင်းၶႆႈၸႂ်ဝႆႉဝႃႈ တေဢဝ်ၶိူင်ႈလၢၵ်ႈၼၢၵ်ႈသင်ပၼ် ဢိတ်ႇသရေးၶဝ်ၼႆႉသေတႃႉ လိုၼ်းသုတ်းမႃး တေပၼ်တၢင်းၵမ်ႉထႅမ်ၵၢၼ်သိုၵ်းသင် ဢၼ်ဝႃႈၼၼ်ႉတႄႉ ဢမ်ႇပႆႇလႆႈတႅပ်းတတ်း ၼႆ ဢၼ်ပဵၼ် ၽူႈယႂ်ႇ ႁူဝ်ၼႃႈ ၽူႈၸတ်းၵၢၼ်သိုၵ်း ၸွမ်သိုၵ်းလူင် Charles Q. Brown Jr. လႆႈလၢတ်ႈမႃးၼင်ႇၼၼ်ယဝ်ႉ။
မၼ်းလၢတ်ႈတီႈ ပၢင်ဢုပ်ႇဢူဝ်း တီႈ ၸၼ်ႉၸွမ် George Washington ၼၼ်ႉဝႃႈ တႃႇဢဝ် ၶိူင်ႈလၢၵ်ႈၼၢၵ်ႈ ဢၼ်သိမ်းဝႆႉတီႈ ငဝ်ႈငုၼ်းသိုၵ်း ပႅၼ်ႇတၵွၼ်ႇ သေ ပၼ်ဢၼ်ဝႃႈၼႆႉ မၼ်းတေ ဢိင်ၼိူဝ်ဝႃႈ တေမီးလွင်ႈတုမ်ႉတိူဝ်ႉ ၼိူဝ်လွင်ႈတူဝ်ႈတၼ်းၵၢၼ်သိုၵ်း တပ်ႉသိုၵ်းဢမႄႇရိၵၢၼ်ႇ မွၵ်ႈလႂ်ဢၼ်ဝႃႈၼၼ်ႉယဝ်ႉ။ ၽွင်းမီးလွင်ႈတိုၵ်းသူၼ်း တွၼ်ႈတႃႇ တိူဝ်းပၼ်လႆႈ တၢင်းၸွႆႈထႅမ် ဢၼ်ၵူၼ်းမိူင်း ပႃးလဵတ်ႈသတၢႆး တီႈၵႃႇၸႃႇ ၶဝ် လူဝ်ႇယူႇၼၼ်ႉ မီးလွင်ႈတိုၵ်းသူၼ်း တႃႇဢဝ် လွင်ႈၵမ်ႉထႅမ် ၵၢၼ်သိုၵ်းသေ ႁဵတ်းလွင်ႈပၼ်လွင်ႈဢဝ်ယူႇၼၼ်ႉ ၸင်ႇလႆႈမီး ၵႂၢမ်းလၢတ်ႈမႃးၼင်ႇၼႆယဝ်ႉ။ လွင်ႈဢၼ် ၽူႈဢဝ်ၶၢဝ်ႇၶဝ် တွင်ႈထၢမ်ဝႃႈ ယွၼ်ႉၼၼ်လႄႈ ဢမ်ႇပႆႇပၼ် လၢၵ်ႈၼၢၵ်ႈ ဢၼ်ဢိတ်ႇသရေးၶဝ် ယွၼ်းဝႆႉၼၼ်ႉႁႃႉ ဢၼ်ဝႃႈၼၼ်ႉ ၽူႈယႂ်ႇ ႁူဝ်ၼႃႈ ၽူႈၸတ်းၵၢၼ်သိုၵ်း ၼႆႉ မၼ်းဢမ်ႇမီးဢဵၼ်ႁႅင်း တႃႇပၼ်လႆႈတင်းသဵင်ႈၵေႃႈၸႂ်ႈ၊ ဢမ်ႇမီးသုၼ်ႇ တႃႇပၼ်ၵေႃႈၸႂ်ႈ၊ ယၢမ်းလဵဝ် ဢမ်ႇပႆႇမီးၸႂ်ၶႂ်ႈပၼ်ၵေႃႈၸႂ်ႈယဝ်ႉ ဝႃႈၼႆ။ ၵူၺ်းၵႃႈဝႃႈ ၵပ်းၵၢႆႇလွင်ႈၼႆႉ တိုၵ်ႉဢုပ်ႇဢူဝ်းၵၼ်တင်း ဢိတ်ႇသရေးယူႇ ၼင်ႇၵဝ်ႇ ၼႆယဝ်ႉ။
လွင်ႈႁူမ်ႈသၢင်ႈ ဢၼ်ၵဵဝ်ႇၵူၺ်း ၽၢႆႇႁူမ်ႇလူမ်ႈ ၼႂ်းၵႄႈ ဢမႄႇရိၵၢၼ်ႇ လႄႈ ဢိတ်ႇသရေးၼႆႉ တိုၼ်းမီးမႃး ၸဵမ်ဢွၼ်တၢင်းယဝ်ႉသေ လူင်ပွင်ၸိုင်ႈ ဢမႄႇရိၵၢၼ်ႇၼႆႉ တွၼ်ႈတႃႇ ၵမ်ႉထႅမ်ၵၢၼ်သိုၵ်း ဢိတ်ႇသရေးၼႆသေ ပၼ် 3.8 ႁဵင်လၢၼ်ႉ ယူႇ ၵူႈပီယဝ်ႉ။
ငိူၼ်ႈငဝ်ႈတိုၼ်း
- VOA News. "အစ္စရေးတောင်းဆိုတဲ့ လက်နက်အားလုံး ကန်မထောက်ပံ့ရသေး" — VOA News, March 29, 2024
- Luis Martinez လႄႈ Chris Boccia. "US 'not willing to provide' some weapons Israel asks for because of American military readiness: General" — ABC News, March 29, 2024
