Wn/shn/မိူင်းဢမႄႇရိၵၢၼ်ႇ မိူင်းၵျႃႇပၢၼ်ႇ လႆႈၸႂ်ၵၼ်ဝႃႈ တေတိူဝ်းႁူမ်ႈမိုဝ်းၵၼ် ၽၢႆႇၵႅတ်ႇၵင်ႈ

ဝၼ်းၸၼ်၊ ၸူႇလၢႆႇ 29၊ 2024 

ၼင်ႇႁိုဝ် ဢမႄႇရိၵၢၼ်ႇလႄႈ ၵျႃႇပၢၼ်ႇ တေမီးလွင်ႈႁူမ်ႈမိုဝ်းၵၼ် ၽၢႆႇၵၢၼ်သိုၵ်း တိူဝ်းလိူဝ်မႃးထႅင်ႈၼၼ်ႉ ၽွင်းလူင်ၽၢႆႇၵႅတ်ႇၵင်ႈ လႄႈ ၽွင်းလူင်ၽၢႆႇၼွၵ်ႈမိူင်း သွင်မိူင်း လႆႈၸႂ်ၵၼ်ဝႃႈ တေႁူပ်ႉထူပ်းဢုပ်ႇဢူဝ်းၵၼ် မိူဝ်ႈၼႆႉ တီႈဝဵင်းတူဝ်ႇၵျူဝ်ႇ မိူင်းၵျႃႇပၢၼ်ႇ ၼႆယဝ်ႉ။

ၼႂ်းၵႃႈ လွင်ႈႁူမ်ႈမိုဝ်းၵၼ် ၽၢႆႇၵၢၼ်သိုၵ်း ၼမ်မႃးၼၼ်ႉ တေႁဵတ်းႁႂ်ႈ တပ်ႉပၢင်သဝ်း ဢမႄႇရိၵၢၼ်ႇ တီႈမိူင်းၵျႃႇပၢၼ်ႇ ၶိုၼ်ႈယႂ်ႇမႂ်ႇသုင် လႄႈ တေႁဵတ်းဢွၵ်ႇ မၢၵ်ႇၼူၾႆး ဢၼ်မီးဝႂ်ၶႂၢင်ႉ ဢမႄႇရိၵၢၼ်ႇ တီႈမိူင်းၵျႃႇပၢၼ်ႇ ၼမ်လိူဝ်မႃး ၼႆယဝ်ႉ။

ၼႂ်းၵႄႈ လွင်ႈလွၵ်ႇငိူတ်ႈ ၶႄႇ ၼမ်မႃးတိၵ်းတိၵ်းၼၼ်ႉ လွင်ႈႁူမ်ႈမိုဝ်း ၼႂ်းၵႄႈ ၸုမ်းဢူၺ်းလီသွင်မိူင်းၼၼ်ႉၵေႃႈ တိူဝ်းမႃးတိၵ်းတိၵ်း။ ၽွင်းလူင်ၽၢႆႇၼွၵ်ႈမိူင်း မိူင်းဢမႄႇရိၵၢၼ်ႇ ဢႅၼ်ႇတူဝ်ႇၼီႇ ပလိၼ်ႇၵႅၼ်ႇ လႄႈ ၽွင်းလူင်ၽၢႆႇၵႅတ်ႇၵင်ႈ လွႆႉဢေႃးသတိၼ်ႇ ႁူပ်ႉထူပ်း ၽွင်းလူင်ၽၢႆႇၼွၵ်ႈမိူင်း ၵျႃႇပၢၼ်ႇ Yoko Kamikawa လႄႈ ၽွင်းလူင်ၽၢႆႇၵႅတ်ႇၵင်ႈ ၵျႃႇပၢၼ်ႇ Minoru Kihara ၼႆယဝ်ႉ။

ဢၼ်ႁွင်ႉဝႃႈ ပၢင်ဢုပ်ႇဢူဝ်း လွင်ႈႁူမ်ႇလူမ်ႈ 2+2 ဢၼ်ၶုၼ်ၽွင်းလူင် ၵၢၼ်ၼွၵ်ႈမိူင်း လႄႈ ၵၢၼ်ၵႅတ်ႇၶႄ သွင်မိူင်း ႁူပ်ႉၵၼ် တီႈၶွမ်ႇမတီႇဢုပ်ႇဢူဝ်း လွင်ႈႁူမ်ႇလူမ်ႈ ၵျႃႇပၢၼ်ႇ-ဢမႄႇရိၵၢၼ်ႇၼၼ်ႉယဝ်ႉ။ ၽွင်းမိူဝ်ႈ ရတ်ႈသျႃး လႄႈ ၶႄႇ လွၵ်ႇငိူတ်ႈ ၼိဝ်ႇၵလီးယႃး ၼမ်မႃးတိၵ်းတိၵ်းၼၼ်ႉ၊ တႃႇတေတိူဝ်းၵႅတ်ႇၶႄႁေႉၵင်ႈ လၢၵ်ႈၼၢၵ်ႈၼိဝ်ႇၵလီးယႃးၼၼ်ႉ ၶုၼ်ၽွင်းလူင်သွင်မိူင်း ဢုပ်ႇဢူဝ်းၵၼ် ပဵၼ်ပွၵ်ႈဢွၼ်တၢင်းသုတ်းယဝ်ႉ။

ၼႂ်းမိူင်းၵျႃႇပၢၼ်ႇၼႆႉ သိုၵ်းဢမႄႇရိၵၢၼ်ႇ မီး 50,000 ၵေႃႉသေတႃႉ၊ ပိူင်လူင်မၼ်း ဢၼ်ၵုမ်းၵမ် လႄႈ ၸီႉသင်ႇ တပ်ႉသိုၵ်းၸိူဝ်းၼႆႉ ပဵၼ်တပ်ႉသိုၵ်း ဢိၼ်ႇတူဝ်ႇပၸိၾိၵ်ႉ ဢမႄႇရိၵၢၼ်ႇ ဢၼ်မီးတီႈ ႁႃႇဝၢႆႇဢီႇၼၼ်ႉယဝ်ႉ။ ၽူႈမီးပုၼ်ႈၽွၼ်းၶဝ် လၢတ်ႈဝႃႈ ၼင်ႇႁိုဝ် တေငၢႆႈလူမ်ၸႂ် တႃႇသွင်မိူင်း တေႁူမ်ႈၵၼ် ၽိုၵ်းၽွၼ်ႉၵၢၼ်သိုၵ်း လႄႈ တူင်ႉၼိုင်ၵႂႃႇမႃးၼၼ်ႉ ၵျႃႇပၢၼ်ႇ မီးၽႅၼ်ၵၢၼ် တႃႇတေယုၵ်ႉမုၼ်း ငဝ်ႈငုၼ်းတပ်ႉသိုၵ်း ဢမႄႇရိၵၢၼ်ႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Mari Yamaguchi. "US-Japan security talks focus on bolstering military cooperation, underscores threat from China" — AP News, July 29, 2024
• Reuters. "US upgrades military command in Japan, warns of China threats" — VOA News, July 28, 2024