Wn/scn/Siquistrati dê forzi di l'òrdini nzigni e strisciuna contra a lu Papa a Palermu

< Wn‎ | scn
Wn > scn > Siquistrati dê forzi di l'òrdini nzigni e strisciuna contra a lu Papa a Palermu

duminicadìa 3 d'uttùviru 2010

Papa Binidittu XVI

Siquistrati dê forzi di l'òrdini nzigni e strisciuna contra a lu Papa a Palermu. A l'uri 11:30, diversi aggenti di pulizzìa n divisa e dâ DIGOS traseru ntâ libbrarìa AltroQuando, situata a Palermu n via Vittoriu Emanuele 143, e custrìnziru lu prupitariu a livari nu strisciuni affissu ô nternu dâ vitrina. Lu strisciuni ricitava " I LOVE MILINGO ", cu rifirimentu a l'ex munzignur Milingo. La pulizzìa siquistrau macari la lucannina dâ mostra "La Papamobile del futuro", allistuta di tri jorna ô nternu dâ libbrarìa, n'espusizzioni di disigni satìrici o irònici supra lu tema. L'opiratu dê forzi di l'òrdini fu giustificatu affirmannu ch'espòniri na frasi sìmili appropiquannu lu Papa e lu sò curteu avìssiru passatu pi via Vittoriu Emanuele avissi statu n'attu offinzivu.

N'episodiu anàlugu succidìu nta n'abbitazzioni privata, nta n'àutra parti dâ cità, sempri n occasioni dâ vìsita dô Papa. Ntâ notti ntra lu 2 e lu 3 d'uttùviru, avìa statu affissu nu strisciuni supra lu tirrazzu d'un palazzu situatu di frunti ô palcu allistutu pi Binidittu XVI ntô foro italico, lu drappu ripurtava na frasi tratta dô vangelu di Matteu: « La mè casa è casa di prijera, ma vuiàutri nni facìstivu na caverna di latruna ». Li forzi di l'òrdini ntirvìnniru sùbbitu, a l'accuminzata circannu a tràsiri n casa, ma essennu spruvvisti di mannatu dâ maggistratura li nquilini mpideru a l'aggenti la trasuta. Doppu, sempri supra addumannata dê forzi di l'òrdini, ntirvìnniru li viggili dô focu, ca strazzaru mità dô strisciuni cu l'ausiliu dê scali mòbbili; l'àutra mità, oramai nun utilizzàbbili, fu ritirata dê pirsuni dô palazzu.

Li strisciuna a favuri dô Papa, apparsi dê primi uri dô jornu pricidenti e dicennu slogan comu « Con Ratzinger contro matrimoni gay e relativismo », jissati dô muvimentu giuvinili dô Popolo della Libertà, Giovane Italia, nun foru oggettu d'attinzioni di parti dê forzi di l'òrdini.

Fonti edit