mercuridìa 18 di nuvèmmiru 2009
Ribera, appruvata la muzzioni di sfiducia ô sìnnacu Scaturro. S'accabbau ntâ peia dê maneri la crisi amministrativa ca s'avìa graputu a Ribera (AG) doppu ca lu sìnnacu Antuninu Scaturro avìa livatu n'assissuri dô Partitu Dimucràticu e appoi puru lu vicisìnnacu dô Muvimentu pi l'Autunumìa.
La muzzioni di sfiducia ca fu prisintata di l'8 cunzigghieri di l'"oppusizzioni stòrica" (6 di l'UDC e 2 dô PDL) fu appruvata attornu ê 00.40 dô 18 di nuvèmmiru cu 14 voti favurèvuli (UDC, PDL, MPA, nu nnipinnenti e un cunzigghieri dô PD), 5 cuntrari (Sinistra e Libertà, lista cìvica I Democratici, un cunzigghieri dô PD, nu nnipinnenti e lu Prisidenti dô Cunzigghiu ca lassau appena l'MPA), lu terzu cunzigghieru dô PD era assenti ô mumentu dâ vutazzioni.
Scaturro fu elettu ntô 2006 appuiatu di 2 listi cìvichi, I Democratici e Rinasce Ribera (appoi cunfluitu nta l'MPA) e di l'Udeur e da Rifondazione Comunista ca pirò nun eliggeru cunzigghieri. La prima crisi amministrativa s'appi nta l'estati dô 2008 quannu n'addumannata di l'MPA di rivìdiri l'eculibri pulìtici avìa purtatu a n'azziramentu dâ junta e na paràlisi amministrativa di cchiù misi.
È la sicunna vota ca un Sìnnacu dâ Cità di l'aranci veni sfiduciatu dô cunzigghiu cumunali: lu 13 d'austu dô 2000 avìa tuccatu a Giuseppi Cortese dô centrudritta, unu dê cunzigghieri di l'MPA ca vutaru ora la sfiducia a Scaturro.
S'aspetta ora ca dâ Riggiuni vegna numinatu lu cummissariu c'havi lu còmpitu d'amministrari la cità finu ê novi elizzioni, ca s'hannu a fari cu ogni prubbabbilità n primavera.
Fonti edit
- «Il Consiglio vota la sfiducia Scaturro non è più sindaco» – agrigentonotizie.it, 18 di nuvèmmiru 2009
- «Ribera, niente fiducia per il sindaco Scaturro. La Regione nominerà un commissario» – SiciliaInformazioni, 18 di nuvèmmiru 2009
- «Ribera, sfiduciato il sindaco Antonino Scaturro» – ANSA, 18 di nuvèmmiru 2009