Wn/scn/Lu Casteddu di Calatubbu grapi arrè li porti

duminicadìa 3 di maiu 2015

Lu Casteddu di Calatubbu grapi arrè li porti. Ntê jorna passati foru annunziati li pròssimi vìsiti ô Casteddu di Calatubbu, furtizza midievali antica ca spunta ntê pressi dâ cità di Àrcamu, n pruvincia di Tràpani. Tali eventu, c'havi locu dô 9 ô 10 di maiu 2015, si nzirisci nta l'àmmitu dâ nizziativa "AlcAmo Culturale" e fu pussìbbili grazzi â participazzioni di l'Assissuratu â Cultura d'Àrcamu e a li vuluntari di l'Assuciazzioni "Salviamo il Castello di Calatubo".

Li vìsiti si tèninu duranti la matina dô sàbbatu dê scoli e lu pumiriggiu dô restu dô pùbblicu. Noltri duranti la dumìnica è pussìbbili usufruiri d'un menzu n partenza di Cuntrata Sasi pressu lu "piazzali Alpa 1". Duranti tali jurnati vèninu svoti vìsiti guidati a òpira di l'Assuciazzioni "Salviamo il Castello di Calatubo" pi fari canùsciri ô granni pùbblicu la storia ciarmanti dô casteddu.

L'Assuciazzioni "Salviamo il Castello di Calatubo" si prudicau cu successu nta l'ùrtimi dui anni pâ prumuzzioni e la rivalutazzioni dô casteddu. Tra l'attività pricidenti svoti di l'assuciazzioni s'arricòrdanu li ricoti dê firmi online e ntê chiazzi, ca pirmìsiru ô casteddu di Calatubu d'aggiudicàrisi lu terzu postu tra "I Luoghi del Cuore" dô Fondo Ambiente Italiano (FAI), e la pulizziatina dô caminu ca porta â trasuta e dâ cappella ô nternu dô casteddu, n priparazzioni ê vìsiti pricidenti tra lu 20 e lu 22 di marzu 2015. Li vìsiti dô 9 e dô 10 di maiu fannu parti dunca di nu nzemi d'attività c'acchiànanu câ misa n sicurizza difinitiva e lu ristoru dô casteddu di Calatubbu, ristituennu accussì â cità d'Àrcamu st'edificiu splènnidu di valuri stòricu e culturali mmenzu.

Fonti edit

«09 e 10 maggio - Prima edizione delle "Giornate del Castello di Calatubo"» – Facebook, 30 d'aprili 2015