| 這篇新聞有漢字的版本。 參考這篇新聞的漢字版本。 |
【2020 nî 6 goe̍h 1 ji̍t sìn】
Liân-ha̍p-boán-pò (聯合晚報) kin-á-ji̍t tùi-gōa soan-pò͘, ùi 2020 nî 6 goe̍h 2 ji̍t khí tio̍h beh thêng-khan, chhòng-khan 32 nî koh 3 kò gōa goe̍h ê Liân-ha̍p-boán-pò tī 6 goe̍h 1 ji̍t ē-po͘ siōng-bóe chi̍t hūn pò-chóa khan-chhut liáu-āu, tio̍h ē chèng-sek siu--khí-lâi. Ūi-tio̍h kám-siā tho̍k-chiá ê chi-chhî, kin-á-ji̍t Liân-ha̍p-àm-pò ê thâu-pán iōng chhòng-khan kàu-taⁿ 1 bàn 1783 kang í-lâi ê thâu-pán pheng chhut tōa-tōa ê "謝謝" (ì-sù sī "kám-siā") nn̄g jī.
Chok-ûi Tâi-oân siōng-bóe ê si̍t-thé àm-pò, Liân-ha̍p-pò-hē (聯合報系) piáu-sī, siū-tio̍h siā-hōe tho̍k-pò si̍p-koàn ê kái-piàn, sò͘-ūi mûi-thé hoat-tián kah sin-koan-hì-iām e̍k-chêng éng-hióng, choăn koat-tēng thêng-chí hoat-khan.
Liân-ha̍p-boán-pò sī Tâi-oân chong-ha̍p-sèng ê Tiong-bûn àm-pò, chhòng-pān-lâng sī Ông Thek-ngô͘ (王惕吾). Tī thêng-khan chìn-chêng, chi̍t hūn pò-chóa bē sin-tâi-phiò 10 kho͘.
消息來源
edit- 聯合晚報自6月2日起停刊，《聯合新聞網》，2020年6月1日．
- 葉冠吟，聯合晚報創刊32年 2日起停刊，《中央通訊社》，2020年6月1日．
- 蔡玟君，再見了聯合晚報！1萬1783天頭版縮圖拼成「謝謝」 派報員感慨：明天就失業了，《ETtoday新聞雲》，2020年6月1日．