| 這篇新聞有漢字的版本。 參考這篇新聞的漢字版本。 |
Kin-á-ji̍t (11/24) tiong-tàu Bí-kok tī Sè-kài Iá-kiû 12-kiông Sài ê tâng-pâi-chiàn tùi-chiàn Venezuela, nn̄g-pêng ê sian-hoat tâu-chhiú sī Casey Lawrence kah tī Tiong-chit Thóng-it Sai hāu-le̍k ê Mario Sanchez.
3-kio̍k-siōng Sanchez khòng-kiû bô ún, tâu-chhut 3-ê pó-sàng hō͘ Bí-kok kong-chiàm móa-lúi liáu-āu, koh hō͘ Carson Williams phah chi̍t-ki hi-seng-táⁿ, sòa--lo̍h-lâi Venezuela ōaⁿ chiōⁿ-lâi ê tâu-chhiú Oddanier Mosqueda mā tâu 2-ê pó-sàng koh sàng Bí-kok 1-hun, Bí-kok 2:0 Venezuela. 6-kio̍k siōng Bí-kok koh kong-chiàm móa-lúi, Chris Okey phah chhut chi̍t-ki lāi-iá an-táⁿ, ū 1-hun táⁿ-tiám, Ricardo Rodriguez koh liù-chhiú tâu oai--khì, pó͘-chhiú mā kiù-bē-tio̍h, Bí-kok cháu tńg-lâi tē-4-hun.
8-kio̍k-siōng Venezuela koh hō͘ Bí-kok kong-chiàm móa-lúi, Carson Williams phah chi̍t-ki 2-hun tá-tiám ê jī-lúi an-táⁿ, Bí-kok 6:0 Venezuela. Āu--lâi sui-jiân Bí-kok koh-chi̍t-pái kong-chiàm móa-lúi, m̄-koh Yohander Mendez sêng-kong kā siú--lo̍h-lâi. Hā-pòaⁿ-kio̍k Venezuela kong-chiàm jī, sam-lúi, Alexi Amarista phah chi̍t-ki hi-seng-táⁿ hō͘ Venezuela tit-tio̍h pún-tiôⁿ pí-sài ê tē-1-hun. 9-kio̍k-hā Dan Altavilla tâu-chhut saⁿ-chiōⁿ-saⁿ-loh, kā Bí-kok ê sèng-lī siú--lo̍h-lâi, Bí-kok tit-tio̍h kin-nî 12-kiông ê tâng-pâi, mā-sī Bí-kok tī 12-kiông ê tē-2-ê chióng-pâi (tē-1-ê sī 2015-nî tit-tio̍h gîn-pâi).
消息來源
edit