| 這篇新聞有漢字的版本。 參考這篇新聞的漢字版本。 |
Kin-á-ji̍t (11/23) tiong-tàu Bí-kok bīn-tùi cha-àm chiah-tú phah-liáu Ji̍t-pún ê Venezuela, nn̄g-pêng ê sian-hoat tâu-chhiú sī Touki Toussaint kah Jesús Vargas.
2-kio̍k-siōng Bí-kok kong-chiàm móa-lúi, Chandler Simpson phah chhut chi̍t-ki it-lúi an-táⁿ tit-tio̍h chit-tiôⁿ pí-sài ê tē-1-hun, āu-chi̍t-pāng Matt Shaw khò iá-chhiú soán-te̍k chiōⁿ-lúi, thàn-tio̍h Bí-kok ê tē-2-hun. 6-kio̍k-siōng jī, saⁿ-lúi ū lâng, Chandler Simpson phah-chhut 1-ki hi-seng-táⁿ, Drake Baldwin cháu tńg-lâi tit-hun, sòa--lo̍h-lâi Matt Shaw kah Carson Williams lóng phah chhut 1-hun tá-tiám ê jī-lúi an-táⁿ, Bí-kok 5:0 Venezuela.
6-kio̍k-hā Venezuela sûi tián-khui hoán-kong, Herlis Rodriguez tī it, jī-lúi ū lâng ê chōng-hóng phah chhut chi̍t-ki ū 1-hun tá-tiám ê it-lúi an-táⁿ, tit-tio̍h Venezuela ê tē-1-hun. 7-kio̍k-hā Carlos Eduardo Perez kòng chhut chi̍t-ki ko͘-hun choân-lúi-táⁿ, kā hun-sò͘ jio̍k kah 5:3. 8-kio̍k-hā Diego Castillo koh kòng chi̍t-ki 3-hun ê hőng-bú-láng, nn̄g-tūi 5:5 pêⁿ-chhiú.
9-kio̍k-siōng Venezuela phài-chhut tī Tiong-chit Hù-pang Hān-chiòng hāu-le̍k ê Hù-lân-ko (Enderso Franco) beh kā siú--lo̍h-lâi, kiat-kó hō͘ Ryan Ward kòng chi̍t-ki ko͘-hun choân-lúi-táⁿ. Lo̍h-bóe Bí-kok í 6:5 phah-iâⁿ Venezuela, in-ūi nā-sī e-àm Tâi-oân su Ji̍t-pún ē chiâⁿ-chò Tâi-oân, Bí-kok, Venezuela sio-kā ê chōng-hóng, ài pí-kàu 3-tūi sio-chiàn ê TQB (tùi-chiàn iu-chit-lu̍t), Tâi-oân ê TQB mā pí 2-tūi lóng koh-khah koân, só͘-í chit-tiôⁿ pí-sài kiat-sok liáu-āu mā khak-tēng koàn-kun-chiàn sī Tâi-oân tùi-chiàn Ji̍t-pún.
消息來源
edit- Premier12 2024 Super Round: Ryan Ward homer gives USA first win．
- United States of America @ Venezuela．