Wn/nan/2020年高雄市市長補選結束，陳其邁當選

【2020年8月15日訊】

參選人	陳其邁	李眉蓁	吳益政
政黨	民主進步黨	中國國民黨	台灣民眾黨
得票	671,804	248,478	38,960
得票率	70.03%	25.90%	4.06%

今仔日（八月十五）高雄市舉辦第三屆市長補選。這擺的補選是中華民國直轄市長自1994年改做民選以來，頭一擺舉辦補選，嘛是高雄人兩年來第三擺投票。這擺的候選人有三位，包括中國國民黨李眉蓁、民主進步黨陳其邁佮台灣民眾黨吳益政參選。最後，陳其邁以67萬1804票當選，得票率超過七成，總體投票率有四成一。

三位候選人攏佇頂晡就完成投票。陳其邁佮吳益政分別有囝兒序細伴𪜶投票，卻是李眉蓁由黨主席江啟臣、國民黨立院團總召林為洲、高雄市議會議長曾麗燕等人陪同。

佇投票期間，有兩位民眾因為違反《公務人員選舉罷免法》去予警方掠去。一位是共手機仔紮入去投票間翕相；另外一位是用家己的印仔頓票，發現按呢做選票會作廢，自按呢共伊剺破。根據《選罷法》的規定，刁工共選票拆毀，會處罰款新臺票5千箍以上，上懸5萬箍；共選票翕起來，會罰3萬箍到30萬箍。

下晝四點，予人當做是投票指標的苓雅區正義里，開票結果出來矣，陳其邁提著807票、吳益政63票，李眉蓁268票，另外有2票無效票，投票率45%。

5點45分，吳益政發表敗選感言，感謝誠濟少年人放下藍綠來共伊支持，予伊受著真大的鼓勵；希望支持者毋通凊心，逐家愛建立閣較好的政治文化。

暗時六點左右，李眉蓁佇競選總部發表敗選感言，伊除了向對手陳其邁講恭喜以外，也期待伊會當解決高雄的債務問題，以後佇市議會嘛會繼續監督陳其邁市長，「雖然有遺憾，但是無委屈。」

6點15分左右，陳其邁的票數達到67萬多票，伊隨就佇競選總部自行宣布當選。陳其邁感謝國民黨李眉蓁、民眾黨吳益政2位選戰對手的祝福，心內有滿腹的感激；未來施政團隊會對產業轉型、增加就業、交通建設、解決空氣污染這四大方面來優先執行，也欲起造一粒一的港灣城市，予每一个人來遮走揣理想。

暗時六點外，高雄市1823个開票所的票全部開煞。根據高雄市選委會統計，民進黨的陳其邁挈著67萬1804票，得票率70.03%；李眉蓁挈著24萬8478票，得票率25.90%；吳益政挈著3萬8960票，得票率4.06%；若共無效票3584張加入去，這改的選舉有96萬2826人出來投票，佔全體高雄市選民（230萬1597人）的41.83%。其中，國民黨這改的得票數佇38个行政區當中，干焦茂林區、桃源區、那瑪夏區贏過民進黨，佮頂擺市長大選提著28个行政區相比是差蓋濟。雖然總體投票的意願誠低，但是陳其邁的得票率超過七成，創民進黨黨史新懸。另外，因為吳益政得票率無懸過5%的戶橂，200萬保證金攏會予人沒收去。

消息來源

• 史上首次高雄市長補選 藍綠白選將上午完成投票，《民視新聞網》，2020年8月15日．
• 高雄市長補選即時開票 陳其邁領先李眉蓁吳益政，《中央通訊社》，2020年8月15日．
• 張如嫻，高雄市長補選　拍照、撕毀選票 左營2名男子遭法辦，《新頭殼》，2020年8月15日．
• 鄭仰哲，直播　李眉蓁敗選感言：雖然有遺憾但沒有委屈，《新頭殼》，2020年8月15日．
• 楊濡嘉、賴郁薇，高市長補選／邁粉雨中搖旗喊「市長好」 陳其邁宣誓：高雄重返榮耀，《聯合報》，2020年8月15日．
• 高市補選　慘輸42萬票！全高雄38區 李眉蓁僅3區贏陳其邁，《自由電子報》，2020年8月15日．
• 陳其邁67萬票當選高雄市長 強調解決空污等4大優先，《中央通訊社》，2020年8月15日．
• 陳貞樺，連鐵藍左營也變綠！完全解讀高雄韓流消長變化，《天下雜誌》，2020年1月12日．

外部網鍊

• 高雄市第3屆市長補選開票統計情形（高雄市選舉委員會）