| 這篇新聞有漢字的版本。 參考這篇新聞的漢字版本。 |
Kin-á-ji̍t (11/21) tiong-tàu Tâi-oân tī Tang-kiaⁿ Kī-tàn bīn-tùi ī-sài A-cho͘ tē-it-miâ ê Venezuela, nn̄g-pêng ê sian-hoat tâu-chhiú hun-pia̍t sī N̂g Chú-phêng kah Lô-ko (Nivaldo Rodriguez). Nn̄g-pêng ê tâu-chhiú lóng hoat-hui liáu chiâⁿ hó, ap-chè tùi-hong ê thûi-á-chhiú, tī tē-2, tē-3 kio̍k lóng sī 3-chiōⁿ-3-lo̍h.
4-kio̍k-siōng Tâi-oân tūi-tióⁿ Tân Kia̍t-hiàn phah-chhut chhia-pò͘-piⁿ ê an-táⁿ, tān-sī tùi-hong gōa-iá-chhiú chhú-lí kah chin-kín, hō͘ Tân Kia̍t-hiàn tī jī-lúi thâu-chêng chhut-kio̍k, sui-jiân āu-chi̍t-pāng Chan Siōng-un mā-phah-chhut jī-lúi an-táⁿ, tān-sī iá-sī bô-hoat-tō͘ the̍h-tio̍h tē-1-hun. 4-kio̍k-hā Venezuela sûi tián-khui kong-sè, seng phah chhut chi̍t-ki an-táⁿ, sòa--lo̍h-lâi 4-hoan Carlos Pérez koh lia̍h-tio̍h N̂g Chú-phêng ê chi̍t-lia̍p 123 kong-lí ê su-lài-tah kòng chhut chi̍t-ki 2-hun ê hőng-bú-láng, che mā sī kin-á-ji̍t nn̄g-tūi ûi-it ê 2-hun.
5-kio̍k-siōng Tâi-oân sui-jiân kong-chiàm móa-lúi, tān-sī Venezuela sêng-kong kā hun-sò͘ siú--lo̍h-lâi, tùi Tâi-oân lâi kóng sī chiâⁿ khó-sioh ê 1-kio̍k. Sòa--lo̍h-lâi tē-6 kàu tē-8 kio̍k Tâi-oân lóng-ū phah-chhut an-táⁿ, tān-sī bô-hoat-tō͘ kā kong-sè chhoàn-liân--khí-lâi tit-tio̍h hun-sò͘, tē-9-kio̍k Venezuela phài-chhut Hù-lân-ko (Enderson Franco) koaiⁿ-mn̂g sêng-kong, lo̍h-bóe Tâi-oân í 0:2 su hō͘ Venezuela, N̂g Chú-phêng tâu 4.2-kio̍k sit 2-hun, Tâi-oân ê kî-thaⁿ 4-ê tâu-chhiú lóng bô sit-hun; Venezuela kui-tiôⁿ phài-chhut 8-ê tâu-chhiú.
Iâⁿ-kiû ê Venezuela āu-chi̍t-tiôⁿ beh tī bîn-á-ē-àm bīn-tùi tē-chú-kok Ji̍t-pún, Tâi-oân tī bîn-á-tiong-tàu ài bīn-tùi Bí-kok.
消息來源
edit- 12強》中華隊挨了委內瑞拉長打重擊 0比2遭完封輸掉複賽首戰 |date=2024年11月21．
- Chinese Taipei @ Venezuela |date=2024年11月21．
- 12強直擊》「不想輸的心態去面對⋯」 黃子鵬1顆失投球吞敗 |date=2024年11月21．