Wn/nan/鄂州佮湖北無症狀感染者歸零

【2020年7月1日訊】

武漢市一間超商的顧客佇進入超商以前當咧度體溫。（相片是2020年1月底翕的。）

根據湖北省衛生健康委員會的消息，6月30日當工，湖北省新增新型冠狀病毒肺炎無症頭感染者0例，轉確診0例，解除隔離1例（鄂州市），猶閣咧醫學觀察的無症頭感染者0例。到今，湖北省所有無症頭感染者頭一擺零確診。

湖北省自4月1日開始公佈無症頭感染者的狀況，單一工新增無症頭感染者上濟的一工是4月2日（51例）；5月31日，湖北省、武漢市無症頭感染者當日新增頭擺為零；6月15日，武漢市無症頭感染者佮𪜶的密切接觸者嘛攏零確診；6月30日，鄂州市最後一例無症頭感染者解除隔離，湖北的無症頭感染者就按呢正式零確診。

鄂州市對1月23日開始發現新型冠狀病毒肺炎的疑似病例，到7月1日為止，累計的確診人數有1394例，其中1335例痊癒出院，59例不治身亡。

消息來源

• 新型冠状病毒肺炎疫情实时大数据报告（湖北鄂州），《百度》，2020年7月1日．
• 2020年6月30日湖北省新冠肺炎疫情情况，《湖北省卫生健康委员会》，2020年7月1日．
• 湖北无症状感染者“清零”，《湖北新闻网》，2020年7月1日．