| Chit phiⁿ sin-bûn ū Pe̍h-ōe-jī ê pán-pún. Chham-khó chit phiⁿ sin-bûn ê Pe̍h-ōe-jī pán-pún. |
【2020年8月28日訊】
今年的廣播金鐘獎佇八月十九日公布入圍名單。踮記者會現場，評審團的主任委員羅小雲講著財團法人原住民族文化事業基金會節目「原聲探索」的時陣，發出「吼吼吼」怪聲，閣共台下原住民問講，「欸，恁是不是應該按呢叫啊！」，這款動作佮言語冒犯著原住民的族群，引發種族歧視的爭議。羅小雲先透過文化部的人佇面冊會失禮，昨昏（八月廿七）閣請辭評審委員的職務，宣布退出評審團。文化部發聲明表示，羅小雲擔任評審是真盡心閣真專業，針對廣播金鐘獎入圍記者會這件代誌，伊已經透過影視局表達歉意，並且已經請辭退出評審團。
原住民族文化事業基金會嘛對失言風波作出聲明，「發出『huo huo huo huo huo』的聲音佮表情，欠缺莊重閣略仔輕率，恐驚會予人想著原住民族的刻板印象；另外『欸！恁是毋是應該按呢叫』這種話，嘛予現場的基金會人員感覺無受著尊重。毋管伊是刁工抑是無張持按呢講，都無法度凊彩放煞歧視言論造成的影響。」基金會對歧視性作為表示遺憾，嘛向望這種刻板印象佮歧視言論袂閣再發生。
雖然羅小雲已經請辭，會失禮的層級也愈來愈懸，毋過今猶是有原住民少年人出來表示，照講羅小雲應該是愛親身出面講予清楚為啥物愛會失禮、到底伊佗位做毋著，按呢較有影。一位原住民少年人 Yawi Yukex 就提起，「文化部敢有寫著『為啥物』羅小雲愛賠不是？彼个原因予恁輕輕仔囥落，敢講文化部抑是羅小雲就是無欲承認家己無歧視？毋過事實就是有，原住民族人上掛意的就是這層代誌。」「這代誌若處理了無好勢，（這種觀念）佇阮這代原住民族人會閣較牢根，原來所講的台灣的『文化』已經共『尊重原住民文化』放掉矣，原來國家的『文化部』是按呢來處理原住民的議題。」
羅小雲因為發言無適當，予種族歧視的爭議繼續佇咧湠燒，雖然伊有會失禮佮請辭，部分的原住民團體猶是無諒解，種族歧視的爭議恐驚是會繼續滾絞。
消息來源
edit- 鄭惟仁、王興中，失言遭批歧視 羅小雲辭廣播金鐘獎評委，2020年8月28日．
- 台灣資深廣播人羅小雲失言挨轟歧視原住民 請辭金鐘獎評委文化部代發聲明引熱議，《台灣英文新聞》，2020年8月28日．
- 【本會聲明稿】回應有關廣播金鐘爭議言論(2020/08/26)，《財團法人原住民族文化事業基金會》，2020年8月26日．
- 第55屆廣播金鐘獎入圍名單今揭曉，《文化部》，2020年8月19日．