| Chit phiⁿ sin-bûn ū Pe̍h-ōe-jī ê pán-pún. Chham-khó chit phiⁿ sin-bûn ê Pe̍h-ōe-jī pán-pún. |
【2020年9月14日訊】
九月十三透早4點12分、5點8分，臺灣南投縣仁愛鄉武界大壩第六號的電動水閘兩改無正常開開，隨造成栗栖溪溪漲，共佇咧溪埔露營的姓盧佮姓賴的兩家口仔、攏總五个人流去，其中姓賴的查埔人家己𬦰起來岸頂，干焦受著輕傷，十三號接紲揣著三个受難者，上尾一个失蹤的盧姓查埔人嘛佇十四早起8點34分佇離安營處11公里遠的所在予空勤直升機揣著。
這件意外總共造成四个人受難，南投檢方佇咧十三暗時訊問兩个台電人員，認為彼當陣值班的蘇姓人員涉嫌業務過失致死罪，以十萬箍新臺票交保；閘門課姓許的課長是先請轉去。南投檢方表示，彼當陣值班的人員發現閘門故障了後，示警佮通報流程攏涉嫌有疏失，猶毋過兩家伙佇咧違法的所在露營也涉嫌民事責任。目前愛先針對台電敢是有人為的疏失進行調查，閣愛到現場針對硬體佮軟體操作勘查，才有法度共責任的歸屬查予清楚。
台電表示武界壩總共有十一个閘門，全部攏佇咧控制室集中控制，水庫放水攏會公布來警告水尾的民眾；猶毋過這改水閘門因為故障自按呢無預警開開，才會袂赴發布警報，無法度通知溪尾的居民。台電初步判定電動水閘會雄雄拍開，原因拍算是送電的電纜線斷電斷無離，才會自動閣控制水閘門振動。台電總經理鍾炳利嘛親身落南來慰問受難者家屬而且予𪜶慰問金，嘛強調講目前會配合檢調調查，若是有人為疏失一定會負責。
經濟部水利署強調，近期會針對全台水壩、水閘門進行總體檢，避免這種代誌閣再來發生。
消息來源
edit- 黃佩君，武界壩放水肇因非老鼠 台電：初判為電纜迴路絕緣異常，《自由電子報》，2020-09-14．
- 黃立偉、張國樑，水閘門異常開啟 台電調查疑電纜絕緣不良，《公視新聞網》，2020-09-14．
- 蕭博陽，武界壩放水釀3死1失蹤 台電員工涉過失致死交保，《中央通訊社》，2020-09-14．
- 楊雅婷，武界壩釀妻兒雙亡 自行上岸倖存者賴男傷勢曝光，《中時新聞網》，2020-09-13．
- 游振昇、賴香珊，失蹤爸爸遺體沖11公里尋獲 武界壩突放水已釀4死，《聯合報》，2020-09-14．
