Wn/nan/多人因違反港區國安法夆掠

【2020年8月11日訊】

周庭佮黎智英。

昨日（八月初十）暗時九點左右，香港前「眾志」成員周庭予十外位警察掠去，暫時扣押佇大埔警署。警方是依周庭違反《港區國安法》第二十九條「勾結外國或者是境外勢力危害國家安全罪」來掠人。周庭面冊表示，警方指周庭對七月到這馬，捌透過社交媒體請求外國對中華人民共和國實施制裁佮敵對行動。

初十予人掠去的閣有香港壹傳媒創辦人黎智英、報紙編輯等等。透早7點左右，差不多10个警察到黎智英佇九龍嘉道理山（Kadoorie Hill）的徛家，入厝調查並且共黎智英逮捕。𫝛時，另外一隊警員到黎智英次子黎耀恩佇西貢的徛家調查並且共伊逮捕。兩人嘛攏仝款是因為《港區國安法》第二十九條予人掠走。《香港蘋果》發聲明譴責港府製造白色恐怖，閣表達報社全體堅守位置毋驚打壓的決心。

警方搜查蘋果大樓期間閣特別要求，干焦「可信媒體」會用到封鎖區採訪，《香港獨立媒體》、《立場新聞》、《美聯社》、《法新社》、《路透社》攏袂當進入採訪區，卻是電視廣播有限公司、香港商業電台、香港有線電視、《NOW》、《香港01》、《東方日報》等15家媒體會使入去。

香港政府表示，昨昏攏總掠十个人，攏是違反港區國安法。國務院、國台辦等單位攏表示，反中亂港分子愛依法嚴懲，嘛斥責美方干涉中國內政。港澳辦也發布聲明，講香港佇一國兩制之下，居民依法享有「前所未有的民主權利和極為廣泛的自由」；但是法治無通挑戰，對遐的「公然挑戰一國兩制底線，實施危害國家安全行為和活動」的「反中亂港分子」，愛用《港區國家法》佮現行的有關法律嚴懲，「絕對袂軟手」。中國外交部發言人趙立堅初十嘛宣布欲制裁盧比奧（Marco Rubio）、克魯茲（Ted Cruz）等十一名「涉港表現惡劣」的美方人士，猶毋過具體制裁措施並無說明。

一寡予中國點名的美國人回唱講，袂因為中國的制裁就勼去，會繼續為香港發聲。美國副總統潘斯也佇推特表示，共黎智英掠走是對全球熱愛自由的人的冒犯，呼籲港府隨共伊放出來。非政府組織「自由之家」批評中國近日的作為是「無理、譀古」，指稱香港當局的做法反映外界進前對「港區國安法」提出的疑慮完全是合情合理。自由之家呼請北京佮香港當局愛遵循香港基本法，並且承諾自由之家會繼續佮香港人民徛佇仝一爿。

消息來源

• 張謙，黎智英父子被捕 涉違反港區國安法勾結外國勢力，《中央通訊社》，2020年8月10日．
• 港警「新措施」 僅容許「可信媒體」進入封鎖線採訪，《自由電子報》，2020年8月11日．
• 黎智英被捕 彭斯：侮辱全球熱愛自由人士，《中央通訊社》，2020年8月11日．
• 国务院港澳办发言人：对勾结外部势力的反中乱港分子必须依法严惩，《新华网》，2020年8月10日．
• 徐薇婷，不畏中國制裁 美議員誓言不退縮繼續為香港發聲，《中央通訊社》，2020年8月11日．
• 尹俊傑，黎智英被捕 美國自由之家批評無理荒謬，《中央通訊社》，2020年8月11日．