مایکروسافٹ پاکستانی زبانن مخصوص حروفان ونڈوز ۸ شامل کوروئے
رپورٹ:حبیب الرحمان
کراچی: چھترارو زبان سورا کوروم کوراک ای ادبی تنظیم کھوار اکیڈمی اوچے مایکروسافٹ کمپنو موژی مفاہمتو ای یادداشتو سورا دسخط ہوی، تفصیلاتو مطابقا مایکروسافٹ کارپوریشن پاکستانو زبانن کھوار ، بلتی، شینا، وخی، بروشسکی، ڈوماکی، کالاشہ، انڈس کوہستانی، گاوری، توروالی، اوشوجو، ہندکو، پوٹواری، بلوچی، براہوی،سرایکی، گوجری، یدغہ، پالولہ، دامیڑی اوچے دیگر څیق زبانن مخصوص حروفان ونڈوز ۸ نامین تان پروگرامو حالیہ ورژنہ شامل کوریکو بچے رضامندی ظاھیر کوری اسور ،ھیہ مقصدو چھترارو ای ادبی تنظیم کھوار اکیڈمی اوچے مایکروسافٹو موژی مفاہمتو ای یادداشت نیویشونو ھوئے۔ دنیوتمام زباننتے ای قسمہ موقع فراہم کوریکو سلسلا مایکروسافٹو خذمت کوساری کھوشت نو، وا کھوار اکیڈمی پاکستانی زبانن لوکلایزیشنو مقصدو پروشٹہ لاکھی "پاکستانی زبانن ترقیو پروگرام"و شوکھورو موڑا "پاکستانی زبانن بچ کورور " نامو سورا ای نوغ پروگرام شروع کورویان ۔ ہے مقصدو بچے مایکروسافٹو سوم مفاہمتو ای یادداشتو سورا دسخط کورونو ھوئے ۔ ھیہ پروگرامو تحتہ پاکستانی زبانن مخصوص حروفان(کیاغکہ یونی کوڈانٹے سپورٹ نو کونیان) مایکروسافٹو ونڈوز ۸ نامین پروگراما شامل کورونو بوی، ہے سلسلا آویلو پروگرام "کھوار زبان پراجیکٹ"و نامو سورا کھوار اکیڈمی ای دستاویز تیار کوری اسور وا کھوار زبانو مخصوص حروفان مایکروسافٹو حالیہ ورژنہ شامل کورونو بوی، وا رحمت عزیز چترالیو تیار کاردو کھوار کلیدی تختی(کھوار کیبورڈ) اوچے" کھوار وکی سافٹ ویر"وساری مدد گانونو بوی ، کھوار اکیڈمیو ارادہ شیر کہ ھیہ ابتدائی پراجیکٹو تحتہ پاکستانو ختم باک زبانن بچ کورونو بوی وا ہے زبانن بچے سافٹ ویر، قاعدہ، کیبورڈ ایجاد کورونو بونی وا ۲۰۱۴ پت پاکستانو ۲۰ زبانن سورا کوروم مکھمل کورنو بوی۔ کھوار اکیڈمیو صدر نشین رحمت عزیز چترالیو مطابقہ پاکستانو اکثر زبان یونی کوڈانتے سپورٹ نو کونیان ھیغین دیتی پاکستانو اکثر زبان لودیاک تان مضمونان رومن اسکرپٹہ نیویشک شروع کوری اسونی وا ھو ای واضح مثال وخی اوچے براہوی زبان شینی، وا کھوار زبانا دی ای کام کتاب رومن اسکرپٹہ چاپ بیتی شینی لیکن کھوار لودیاک رومن کھوارو مسترد کوری اسونی ، ہسے ریتای کہ کیہ دی زبانہ نوغ ھوازان ایجاد بو جم کوروم، ہسے ریتای کہ ھیس دی کھوار زبانو بعض ھش ھوازان نشان دیتی اسور کہ ھیت کھوار زبانا موجود بیکو سوم باوجود ہے ووشکی کا توجہ نو پرانی مثالو طورا ھیس ای کھوار زبانا ای نوغ لام(ڵ) ایجاد کوری اسور وا ھیہ لام کھوار زبانا ریکا گویان بچومکہ نیویشیکا نو گویان وا ھیہ لام لوظ 'اللہ' موجود شیر۔ رحمت عزیز کھوارو ہے مخصوص ھوازان بچے حروف اوچے یونی کوڈ دی ساوزے آسور ، ھیہ لو واضح بای کہ رحمت عزیز چترالی کھوار وکی سافٹ ویراوچےکھوار کلیدی تختی ایجاد کوری کھوار و بین الاقوامی سطحہ متعارف کوری اسور وا رحمت عزیز چترالیو پاکستانی زبانن خصوصا چھترارو زبان بچے نوغ ایجاداتن وجھین کھوار ھانیسے عالمی سطحہ متعارف بیتی شیر وا کھوار زبانو آولانو انسایکوپیڈیا دی پورا دنیا لوڑونو بویان، ہسے ریتای کہ کھوار اکیڈمی اوچے مایکروسافٹ ای بیتی ھیہ پراجیکٹو شروع کوریکو سفان ساری زیات خوشانی متے حاصل ہوی کوریکو کہ ھیہ گیاک نسلان حوصلہ افزائی کوروی وا ھیتانتے نوغ راہان پشیر ۔ اوا بحثیت ای لسانی رضاکار بوخوشان وا پر امید اسوم کہ ھیہ پراجیکٹو بو خاطر خواہ مثبت نتائج پروشٹہ گونی وا ھیہ پراجیکٹ نہ صرف پاکستانی زبانن لوکیلایز کوریکا، کمپیوٹرو تربیت اوچے کمپیوٹرو تعلیما اضافہ کوریکو بچے ای میر بوھرتو ثابت بوی بچمومکہ پاکستانو ہر زبان لودیاکن ھیتان آئیڈیان حقیقتو رنگ دیکو بچے حوصلہ افزائی کوروی۔