參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
【2018年6月19號訊】
昨暝（18號），LINE公司其首席執行官出澤剛講，卜敆全日本其店頭共館店推廣「印刷式」其二維碼支付。
現在日本二維碼支付其主流方式，是顧客自家掏出手機，討出二維碼，讓賣乇其儂來掃。出澤剛講其「印刷式」支付，是將收錢其二維碼拍印出來，乞儂使手機掃。嚽共現在主流其方式𣍐蜀樣。伊講，拍印蜀張紙，無花開店其儂偌夥錢，引入二維碼支付其成本就沰下來了，嚽就是「印刷式」支付其好。敆中國，墿墘其攤都會總款收錢。
LINE公司希望可以通過「印刷式」支付推廣自家號𡅏LINE Pay其支付服務。按出澤剛其形容，顧客會拍開LINE應用，自家掃描紙懸頂其二維碼，之後使LINE Pay乞錢。遘現在，LINE公司內部食堂賣便當其位處，固有福岡縣其外賣便當店，都引入了茲蜀種支付方式。
LINE公司卜想讓固価所在會使LINE Pay。茲蜀家公司公佈了目標，今年之內會使LINE Pay其所在——包括店共自動販賣機，數量著達遘蜀百萬。故此，LINE拍算將二維碼推廣遘便利店共其他野大其百貨公司。蜀方面，LINE也想將「印刷式」支付推廣遘中嫩規模其店，總款好讓固価所在會使LINE Pay。
今年敆日本，樂天公司也向的士公司等等推廣了「印刷式」二維碼支付。
消息來源
edit- ＬＩＮＥ、「印刷式ＱＲ決済」を全国展開へ 導入コスト軽減にメリット. 産経ニュース. （原始内容存档着2019-06-22） （Japanese）.