Wn/cdo/雕印捏儂囝寫春聯 福州下杭年尾活動逢乇都有

< Wn‎ | cdo
Wn > cdo > 雕印捏儂囝寫春聯 福州下杭年尾活動逢乇都有
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

【2018年2月3號福州訊】

迎新春活動倛寫春聯攤位

年關卜遘,今旦(3號)福州臺江下杭陳文龍尚書廟門前兜,福州市共青團、教育系統迎新春活動如期舉辦。歌舞、雕印、書法,逢乇名都有。真価儂來參觀,現場野鬧熱。

早頭8點半左右,雕印倛、捏儂囝倛、寫春聯倛、唱歌跳舞倛,陸陸續續都來了。9點,活動正式開始,所有攤位都開始自家倛事計。

敆寫𡅏「上下杭」三字倛牌坊下底,是表演歌舞倛所在。舞獅、相聲,固有伲囝哥唱歌,慶祝新年。表演倛儂都是趁中小學共藝術團來倛。市民紛紛䀹相,掌聲無停。3刻鐘之後,表演完了,主持人引導大家儂行過三通橋,遘水塘對面躒蜀躒。

樟林小學倛學生著𡅏雕印

水塘邊,雨棚下,蜀陣學生圍𡅏坐,著𡅏雕印。嚽是「篆刻時光」活動。伊各儂拈𡅏刀,敆圖書石𡅏雕刻篆字,比如講「吉祥」「」等等,只蠻認真。伊各儂來自樟林小學倛篆刻工作室,無上課倛時候稠稠學雕印。市民乞吸引,徛𡅏慢慢相伊雕,儂罔變罔価,圍了蜀環復蜀環。聽完沈先生介紹伊各儂平常倛活動,蜀隻依伯野激動,緊緊搦𡅏先生倛手講:「意義盡去野大!」

陳文龍雕像後兜,是鼓山苑小學倛學生做燈籠。有倛掏去彩色倛紙鉸燈籠,有倛敆已經做好倛燈籠懸頂畫畫寫字。字都是吉祥倛話,比如「學業有成」「天長地久」,也有「有錢任性」。水墘固有捏儂囝倛攤位。儂囝都是施埕小學倛學生做倛。儂囝野好看,讓𣍐少伲囝哥𣍐愛行,就徛𡅏相,依公依嬤都無奈何。對面𡅏,有兩隻晉安附小少年郵局倛諸娘囝賣郵票。茲家郵局是福建省頭蜀家雷鋒少年郵局,都是學生自家經營。精美倛郵票也讓儂愛不釋手。遘了10點左右,來覷倛儂慢慢變少去,諸娘囝倛依媽趁對面帶來燈籠乞伊各儂客佻。伊各儂野歡喜,摜𡅏燈籠跳來跳去。尚書廟門邊兜是「剪紙飛花」攤位。華倫中學倛學生敆嚽呢剪窗花。紅紅倛窗花掛壁𡅏,乞現場增加做節倛氣氛。窗花倛圖案𣍐蜀色,細節野豐富。來覷窗花倛林依姆比起大拇哥,講伊各儂「手野巧」。

三通路墿墘是春聯攤位。寫春聯倛儂四十幾隻,其中有中小學倛學生,固有伊各儂倛先生。中學包括三中、十八中、十九中、教院附中、華倫中學等等。會寫倛字體也𣍐少,有篆書、行書、楷書等等。學生志願者乞市民蜀張單單,市民卜挃什乇春聯,就敆便利貼𡅏寫序號。再排隊等儂寫好春聯,放邊兜晾。春聯大受歡迎,有倛市民蜀對無夠,卜挃固価,復去討志願者。市民得遘春聯,都野歡喜,講「謝謝同學」。學生凊天𡅏寫半前日,聽遘感謝,心𡅏也見覺盡去安慰。寫春聯倛潘申潤,是已經畢業野𣆯倛三中學生,伊講自家是第七年參加義務寫春聯。這七年,有想過伓使做,但最後固是一直堅持。伊對維基記者講:「儂家平常愛講堅持,其實正正倛堅持就是不忘初心、砥礪前行。正正倛初心就是奉獻青春,實現自家倛價值。可能有倛儂會見覺奉獻這詞野空泛,但是講將自家投入遘正正需要汝倛地方,遐時候再講奉獻,就會心裏有底。」

10點半,大部分攤位都收攤了。春聯攤位儂比較価,遘11點20分左右乍收攤。

採訪 edit

早頭7點半倛時候,三中學生會社工部倛同學就遘了春聯活動倛地方,排開木桌。驚等儷盪雨,固搬了帳篷放邊兜。活動之後搬乇,忙完已經12點了。維基新聞得遘蜀隻機會,採訪三中社工部部長鄭小滿同學。聽蜀聽伊怎講吧。

維基記者共福州三中學生會社工部部長鄭小滿倛採訪音頻
 
維基新聞

同學汝好啊!我看見今旦倛活動做倛野好。請問社工部敆活動之前做了什乇準備工作?活動時候主要負責底方面?

  • :福州市教育系統倛志願寫春聯活動,是三中每蜀年都有參加倛蜀項傳統活動。社工部成員敆活動當日早頭7點半,卜趕遘活動現場,做準備工作。儂家主要負責佈置現場,維持活動秩序,引導市民有秩序倛領取春聯。
 
維基新聞

噲汝認為參加茲萆活動有什乇意義哩?

  • :志願者精神提倡「互相幫助、助儂自助、無私奉獻、無求回報」。儂家希望同學會稠稠參加有味倛志願活動,豐富同學倛志願活動類型,為社會做出仂囝貢獻。同時敆春節卜遘之時,為春節增添蜀份年味。
 
維基新聞

對茲蜀萆活動固有無其他想講倛話哩?

  • :今旦活動臺中,蜀部分活動是體力勞動。社工部今年暝諸娘囝𣍐少,但是大家積極性都野懸。我作為部長野感謝每蜀隻同學倛付出。

消息來源 edit

原創報導
這報導有維基記者第一手新聞。可以看討論頁了解詳情。