【2019年2月16號訊】
昨暝，福州元宵燈會正式點燈。
鼓樓區燈會做遘24號，晉安、臺江、馬尾、倉山燈會做到19號。每蜀暝晡其六點半遘九點，都會使看燈。
鼓樓其主展區是溫泉公園。除此之外，五一廣場、屏山公園起了兩芘大型燈組；烏山南邊山骹其門口——也就是烏山路吳清源會館前斗——裝了蜀芘燈組；鰲峰坊格致中學前斗廮了蜀芘燈組；軍門廣場——也就是八一七北路共織緞巷其墿口固有蜀芘豬囝佩奇主題燈組。
同時，作爲三坊七巷、朱紫坊、上下杭元宵節系列活動其蜀部分，前兩芘位處也有做燈會。
晉安燈會主會場敆鶴林路其牛崗山公園夫塊。倉山燈會主會場敆飛鳳山公園，嚽是只隻公園頭蜀回做燈會其主會場。
臺江燈會敆閩江大橋遘鰲峰大橋其北江濱中大道做。長1.5公里，有十芘大型燈組。
「兩馬同春鬧元宵」燈會敆江濱東大道。今年兩馬燈會已經做遘第十七屆了。千米其展區，共總有76芘大燈組。
消息來源
edit- 陈海东; 马丽清; 赵铮艳; 何佳媛; 彭辉; 叶朝榕; 张旭阳. 福州元宵灯会明晚正式亮灯 鼓楼区灯会将持续至24日. 中共福建省委港澳工作办公室. 2019-02-15 [2019-02-16].
- 三坊七巷官微. 元宵佳节，三大街区给你最浪漫的灯光夜景，最精彩的游艺市集. 微信. 2019-02-15 [2019-02-17].
- 东南快报. 2019年福州元宵灯会攻略！你可以这样玩！. 微信. 2019-02-13 [2019-02-18].