參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
【2018年7月26號訊】
馬來西亞詩巫有蜀條墿，通向劉欽侯醫館，號𡅏劉欽侯路。雖然講名字是總款，但是墿牌一直都𣍐蜀樣。今旦（26號），「劉欽侯路」其墿牌起好了。
茲蜀條墿本底就號𡅏劉欽侯路。1997年，詩巫有出蜀張地圖，地圖懸頂就有「劉欽侯路」茲蜀萆名字。之後墿名變成了醫館路（Jalan Hospital）。2015年，華社發起簽名運動，卜留下「劉欽侯路」茲蜀萆名字，市議會批准了。但是租塊復發展起商業區，墿牌一直無換。市民一直呼籲，遘尾了今旦乍起好。
劉欽侯是閩侯儂，1916年遘砂拉越其詩巫栽𣗬奶。過了15年，伊趁了野価錢，轉遘家鄉。離開之前，伊將留敆砂拉越其財產全部題捐，嚽包括了土地、厝、摩多船、借款抵押等等，充做政府起蜀座新醫館其蜀半錢。新醫館就告劉欽侯醫館，由1936年起好。1994年變成紀念館，固留下蜀部分其厝做小型診療所，一直遘2008年。就總款，劉欽侯醫館乞詩巫乃至砂拉越中區50萬隻儂服務了大概72年。
今旦伓啻劉欽侯路蜀條墿起好墿牌，附近其巷巷也有，比如「劉欽侯路第一巷」等等。