【2018年2月19號訊】
前日（17號）三坊七巷宗陶齋，福清海絲文化展示週倛活動繼續舉辦。福清非物質文化遺產——傀儡戲倛傳承人林松生共福清市城關小學傀儡戲社團，乞大家表演了茲蜀種傳統技藝。
福清傀儡戲有150多年的歷史，收錄著福清市第二批非物質文化遺產名錄裏勢。福清野価鄉鎮倛儂，若卜做節，或者慶祝什乇事計，都會邀請傀儡戲班，去廣場或者廳中表演。昨暝帶𡅏小學生表演倛林松生，就是茲蜀種戲倛第五代傳承人。七年前林松生向《東南快報》記者介紹倛時候，講福清倛傀儡戲共閩南、莆仙等等地方都𣍐蜀樣，福清傀儡吊掛線共總有13條，總款會讓傀儡活動起去固活，表演形式也固豐富。以前福清農村愛看傀儡戲倛𣍐少，遘新世紀以後，愛看倛儂含不撮𡅏變少去。固加卜演好傀儡戲，需要三四年時間練基本功，故此傀儡戲可能就無儂傳承了。三年前，福清有關部門邀請林松生去福清城關小學教傀儡戲，之後教出蜀堆復蜀堆新生力量。今旦著宗陶齋𡅏表演完，觀眾倛反響讓林松生盡去野激動。林松生講：「今旦儂野価，野熱情，我野感動。」共伊表演倛學生陳鑫源，也講自家見覺這戲野有味。
消息來源
edit- 福清小学生传承提线木偶绝活 三坊七巷宗陶斋今日上午有十番音乐展演. 福州新聞網.
- 福清提线木偶戏"后继无人" 现有艺人逐渐步入古稀之年. 東南網.