參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
【2018年2月10號福州訊】
今旦（10號）暝晡，福州八一七路東街口遘津泰路口蜀段墿乞封起去，車都無辦法行裏。傒勢哩？因為租塊舉辦了「東街口嘉年華·狂歡夜」活動。維基記者7點躄遘現場，已經無辦法接近中心區域，離開也野困難。7點半嘉年華開始，墿邊開彩燈，蜀條街都野光，大家紛紛掏出手機䀹像。嘉年華有駃閃、樂隊、武術、模特、街舞、擊鼓舞龍、極限特技、熒光花繩、年代大秀等等節目。現場儂真価，有倛自家覷𣍐著，就肩頭𡅏脢囝，想讓伲囝哥歡喜。同時，墿邊固有野価攤位，有倛剪紙，有倛捏儂囝，有倛做糖畫，有倛做油紙傘，固有儂寫春聯。根據去覷倛儂講，遘今旦10點，鼓樓（鼓屏路共鼓西路附近）固是塞車。
也是今旦暝晡，6點，位於達明路倛達明美食街揭牌開街了。美食街倛特色是閩臺風味，臺灣士林夜市小喫協會、臺南美食協會等等商家都有參與。墿邊倛館店都敆門邊放了電子屏，寫出招牌菜。墿邊有館店，墿中也有餐車。今旦暝晡，墿臺中排了68架餐車。頭蜀日開街儂恰価，也有市民敆網絡懸頂講自家乇都食𣍐著。達明路附近學校𣍐少，之前𡅏美食街倛消息乍出，有倛學生也做蠻笑講：「以後暝晡就無心學了。」
南街倛交通管制趁7點開始，遘明旦（11號）半暝晡2點乍會結束。達明路趁今旦開始，每蜀日暝晡6點遘第二日半暝晡2點，車都伓使行裏。
-
南街燈光 -
肩頭脢囝
今旦暝晡，趁達明路遘南街，都只蠻鬧熱。蜀隻市民共記者講：「以前𡅏東街口儂就只蠻価，著起地鐵，儂乍變少去。但是講福州儂固是鐘意東街口，儷有機會，就會去東街口客佻。」
消息來源 edit
- 去东街口“狂欢” 给你份出行指南. 海峽都市報.
- 周六，东街口将因这两个活动交通管制！怎么绕行？车停哪里？都给你备好了…. 東南快報.
- 福州达明美食街开业 突出闽台特色打造榕城版“士林夜市”. 人民網.