【2020年2月7號訊】
武漢中心醫院拜五（2月7號）講，眼科醫生李文亮著工作其前後感染新型冠狀病毒，搶救無效，今旦2點58分去世。
醫院公佈這芘之前，網絡懸頂已經有儂共媒體講李文亮去世。《新京報》快訊講，報社其記者「2月6號暝晡由武漢市中心醫院內部仈傳，仈曾乞訓誡其武漢市中心眼科醫生李文亮著2月6號暝晡搶救無效去世。」
但是復有消息講，伊雖然講心臟停下，㑚是講故著𡅏接受體外膜肺氧合（ECMO）搶救。遘今旦0點38分，武漢中心醫院有認證其新浪官方微博講，「目前病危，著𡅏全力搶救。」
世界衛生組織（WHO）著美國東部時間2月6號早起頭10點25分發推文講：「李文亮醫生去世，儂家深感悲痛。儂家都著讚美伊對2019新冠病毒所做其工作。」
世衛組織接下除去這蜀條推文，故解釋講：「著今旦有關2019新冠病毒其新聞簡報會懸頂，（世衛組織突發衛生事件規劃執行主任）邁克·瑞安博士乞問遘有關李文亮醫生去世其消息，伊表示了哀悼。世衛組織無關於李醫生狀況其信息。」
2019年12月30號，武漢中心醫院眼科醫生李文亮著微信懸頂共伊同學發了蜀條信息，警告同學各儂講，武漢華南海鮮市場可能有疫情。
嘻前後李文亮講，伊看見蜀份病儂檢驗報告顯示，SARS冠狀病毒高置信度陽性指標。介看囇之後疫情其發展，嚽確實完全是蜀種新其冠狀病毒。
當地其警察著2020年1月3號傳訊了李文亮，並且講伊著互聯網懸頂「發佈不實言論」，對伊訓誡，警告伊若無悔改，繼續從事違法活動，將受遘法律制裁。李文亮著訓誡書懸頂簽字、畫押。
1月8號，李文亮上班其時候碰遘不明病毒性肺炎患者。1月10號，李文亮嗽咳咳，故發熱。12號住院。
消息來源 edit
